Soomaaliya, 14 Oct. 25 (Dawan) — 40 haween boolis ah oo ka tirsan Dowlad Goboleedka Koonfur Galbeed Soomaaliya ayaa dhammaystay tababar saddex maalmood ah oo ay taageereysay Qaramada Midoobay (UN), kaas oo lagu qabtay magaalada Baydhabo.
Tababarkani wuxuu xooga saaray adkeysiga shaqaalaha, maaraynta cadaadiska, horumarinta caafimaadka maskaxda, iyo dhisidda shabakad haween ah oo awood u leh inay si kalsooni iyo daacadnimo leh ugu adeegaan bulshada.
Tababarkan waxaa hogaamineysay Xoghayaha Cadaaladda ee Howlgalka Kaalmada Kumeelgaarka ah ee Qaramada Midoobay ee Soomaaliya, taas oo ku tilmaantay barnaamijkaan mid diiradda saarayo kor u qaadidda awoodda iyo kalsoonida haweenka booliska ah ee Soomaaliya.
“Tababarkan wuxuu la jaanqaadayaa natiijada afraad ee Barnaamijka Booliska ee Wajigiisa Labaad, kaas oo xooga saaraya kordhinta tirada iyo joogteynta haweenka booliska ah, iyo kor u qaadidda xirfadooda shaqo iyadoo la siinayo tababaro gaar ah, oo ay ku jiraan baaritaannada kufsiga iyo xadgudubyada kale ee SGBV,” ayay tiri Blanchard.
Blanchard waxay sheegtay in Qaramada Midoobay ay u aragto caafimaadka maskaxda iyo maaraynta cadaadiska inay yihiin tiir muhiim u ah booliska oo wax ku ool ah.
“Waa muhiim in la maalgeliyo caafimaadka maskaxda, maaraynta Cadaadiska, iyo adkaysiga dhammaan saraakiisha booliska, sababtoo ah taasi ayaa go’aamisa sida ay uga falceliyaan xaaladaha adag iyo sida ay shaqadooda u gutaan,” ayay tiri. “Haweenka booliska ah waxay la kulmaan culaysyo dheeraad ah, sida shaqada, daryeelka carruurta, masuuliyadda qoyska, iyo mararka qaarkood ceeb ka timaadda shaqo ay dadku u arkaan in ragga kaliya ay qabtaan.”
Waxay intaas ku dartay in tababarkan uu door weyn ka ciyaari doono kalsoonida bulshada ee booliska.
“Dhaqanka qof shaqaale ka ah hay’ad ayaa saameyn ku yeelan kara sida bulshada ay u aragto hay’addaas. Markaan barno xirfado adkaysi iyo xasillooni, haweenkan booliska ah waxay awood u yeelan doonaan inay si hufan u gutaan shaqadooda oo ay kor u qaadaan kalsoonida bulshada,” ayay tiri Blanchard.
Waxay sidoo kale xustay in Qaramada Midoobay ay rajaynayso in barnaamijyo la mid ah kan lagu qabto dowlad goboleedyada kale, inkasta oo ay saamayn karto xaaladda maalgelinta. “Qaramada Midoobay weli way ka go’an tahay taageeridda booliska Soomaaliya, taas oo ay ku jiraan barnaamijyada xoojinta haweenka booliska ee gobollada xubnaha ka ah Federaalka,” ayay tiri.
Barnaamijka Booliska ee Wajigiisa Labaad (Joint Police Programme – Phase II) waa dadaal ballaaran oo Qaramada Midoobay ku taageerayso horumarinta booliska Soomaaliya, kor u qaadidda ka qeybgalka haweenka, iyo dhisidda boolis wax ka qaban kara arimaha bulshada, si loo xoojiyo nabadda, ammaanka, iyo xasilloonida guud ee dalka.