Addis Ababa (Dawan) – Ra’iisul Wasaaraha Itoobiya, Abiy Axmed, ayaa Sabtidii si rasmi ah u daahfuray afar warshadood oo waaweyn oo isugu jira kuwa soo saara tamarta qoraxda iyo gaas, kuwaas oo laga hirgeliyay magaalada Hawassa ee Deegaanka Sidama, sida ay sheegtay warbaahinta Dowladda Deegaanka Soomaalida Itoobiya (SRTV Somali).
Warshadaha la furay ayaa ka kooban wejiga labaad ee mashruuca Toyo Solar Energy, iyo warshado kale oo soo saara qalabka solar-ka oo kala ah Origin iyo Lumintech, iyo sidoo kale warshadda gaaska ee HZ Gas.
TV-ga SRTV Somali ayaa sheegay in warshadahan soo saara tamarta solar-ka ay si wadajir ah u soo saari doonaan qiyaastii 11.3 gigawatt oo tamar nadiif ah sanadkii, halka warshadda HZ Gas ay soo saari doonto ilaa 900 tan oo oksijiin ah, 40,000 oo tan oo naytrojiin ah, iyo 7 tan oo haydarojiin ah sanadkii.
