Muqdisho (Dawan) — Aqalka Sare ee Baarlamaanka Federaalka Soomaaliya ayaa ansixiyey Hindise-Sharciyeedka Dhismaha Hay’adda Saadaasha Hawada, kaddib markii 27 Sanatar ay codkooda ku taageereen, iyadoo aysan jirin cid diidday ama ka aamustay, sida uu sheegay Guddoonka Aqalka Sare.
Ansixinta hindise-sharciyeedkan ayaa ka dhacday inti lagu guda jiray kulanka 10-aad ee kalfadhiga siddeedaad ee Golaha Aqalka Sare, kaas oo uu shir-guddoominayay Guddoomiyaha Aqalka Sare, Cabdi Xaashi Cabdullaahi.
Ka hor inta aan codka loo qaadin hindise-sharciyeedka, Xoghayaha Guddiga Khayraadka Qaranka ee Aqalka Sare, Sanatar Samsam Daahir Maxamuud, ayaa Golaha u soo bandhigtay warbixinta akhrinta saddexaad, iyadoo ka codsatay Sanatarrada inay meel mariyaan.
Kaddib soo bandhigidda warbixinta, Golaha ayaa cod u qaaday hindise-sharciyeedka, waxaana oggolaaday dhammaan 27-kii Sanatar ee codka dhiibtay.
Dhanka kale, Aqalka Sare ayaa akhrinta koowaad marsiiyey Hindise-Sharciyeedka Iskaashiga Garsoorka, kaas oo uu Golaha ka hor akhriyey Wasiirka Caddaaladda iyo Arrimaha Dastuurka ee Xukuumadda Federaalka Soomaaliya, Xasan Macallin Maxamuud. Wasiirka ayaa sheegay in hindise-sharciyeedkani uu saldhig u noqon doono hirgelinta sharciyo muhiim u ah iskaashiga garsoorka caalamiga ah, gaar ahaan la-dagaallanka dambiyada caalamiga ah, is-weydaarsiga maxaabiista iyo isu-dhiibidda eedeysanayaasha ama dadka dambiyada lagu xukumay. Waxa uu tilmaamay in iskaashigaasi uu ku salaysnaan doono habraacyada sharci ee khuseeya, si loo xoojiyo wada-shaqaynta Soomaaliya iyo dalalka kale ee dhinaca garsoorka.
