Muqdisho (Dawan)- Aqalka Sare ee Baarlamaanka Federaalka Soomaaliya ayaa Shalay akhrinta labaad marsiiyay Hindise Sharciyeedka Macdanta Jamhuuriyadda Federaalka Soomaaliya, iyadoo Sanatarradu ka doodeen qodobbada sharciga iyo muhiimadda uu u leeyahay maamulka khayraadka dalka, sida uu sheegay Aqalka Sare.
Kulanka oo uu shir-guddoomiyay Guddoomiyaha Aqalka Sare Cabdi Xaashi Cabdullaahi, waxaa ka qayb galay Guddoomiye Ku-xigeenka Koowaad Cali Shacbaan Ibraahim iyo Guddoomiye Ku-xigeenka Labaad Cabdullaahi Cali Xersi Timacadde.
Guddoomiyaha Guddiga Khayraadka Qaranka ee Aqalka Sare, Sanatar Saynab Ismaaciil Maxamed, ayaa Golaha u soo bandhigtay warbixinta akhrinta labaad ee hindise sharciyeedka, iyadoo ka warbixisay wax-ka-beddellada, sixitaannada iyo la-tashiyadii uu guddigu sameeyay intii uu ku jiray dib-u-eegista sharciga.
