Laascaanood (Dawan ) — Magaalada Laascaanood ayaa maanta martigelisay munaasabad siyaasadeed oo miisaan culus leh, kaddib markii caleema-saarka Madaxweynaha iyo Madaxweyne-ku-xigeenka cusub ee Dowlad-goboleedka Waqooyi Bari Soomaaliya uu isu beddelay dhoollatus diblomaasiyadeed oo ballaaran, oo ay ka soo qeyb galeen safiirro iyo wakiillo ka socda dalal dhowr ah.
Munaasabadda, waxaa ka qeyb galay safiirka Turkiga ee Soomaaliya Alper Aktaş, safiirka Boqortooyada Sacuudi Carabiya Ahmed bin Mohamed Al-Muwallad, iyo safiirka Suudaan Abdelghani Elnaeem Abdelghani, kuwaas oo joogitaankooda loo fasiray fariin diblomaasiyadeed oo muujinaysa taageero cad oo loo hayo madaxbannaanida, midnimada dhuleed iyo xoojinta nidaamka federaalka Soomaaliya.
Sidoo kale, xafladda ayaa waxaa goob joog ka ahaa diblomaasiyiin kale oo ka kala socday dalalka Qadar, Jabuuti, Itoobiya iyo Kenya, taas oo sii xoojisay aragtida ah in caleema-saarka hoggaanka Waqooyi Bari uu helay taageero iyo ka-qeybgal caalami ah.
Xafladda ayaa isu keentay hoggaamiyeyaasha Dowladda Federaalka Soomaaliya, qaar ka mid ah madaxda dowlad-goboleedyada, odayaasha dhaqanka iyo wakiillo ka socda bulshada rayidka ah, taas oo muujisay muhiimadda siyaasadeed ee ku biirista rasmiga ah ee Waqooyi Bari ee nidaamka federaalka dalka.
