Cirro oo farriin soo diray isaga oo qariyay halka uu joogo

Hargeysa (Dawan) — Madaxweynaha Somaliland, Cabdiraxmaan Maxamed Cabdullaahi (Cirro), oo saacadihii ugu dambeeyay la is waydiinayay halka uu u safray ayaa maanta farriin usoo marsiiyay shacabka Somaliland baraha bulshada, isaga oo aan sheegin goobta uu ku suganyahay.

Cirro ayaa Facebook kusoo qoray " Shacabkayga Jamhuuriyadda Somaliland meel kasta oo ay joogaan waxa aan u soo dirayaa salaan & bogaadin, anniga oo u rejaynaya khayr, nabad, iyo barwaaqo"

Cirro ayaa baraha bulshada ku soo bandhigay sawiro muujinaya in uu safar ku joogo mid ka mid ah dalalka Yurub, iyadoo ay u badan tahay Switzerland, taas oo laga fahmi karo labiskiisa oo ku habboon meel qabow leh iyo calaamadda diyaaradda uu sawirka ku muujiyay.

Sidoo kale Wafdi ka socda Somaliland ayaa lagu arkay magaalada Davos ee Switzerland, oo martigelineysa Shirweynaha Dhaqaalaha Adduunka.

Inkastoo sawirrada iyo qoraalkaasi si weyn loogu faafiyay baraha bulshada, haddana ujeedada dhabta ah ee safarka madaxweynaha ayaan weli si rasmi ah loo caddeyn., iyada oo madaxtooyada Somaliland ay ka gaabsaday bixinta faahfaahin ku saabsan sababta safarkan iyo halka uu Cirro ku sugan yahay, taas oo dhalisay jahwareer iyo su’aalo ka yimaada bulshada kuna saabsan qarinta macluumaadka safarka.

Somaliland oo muddo ka badan 30 sano ku baadi-goobaysay aqoonsi caalami ah ayaa dhamaadkii sanadkii hore aqoonsi ka heshay Israa’iil, kaddib markii ay taleefan kuwada hadleen Cirro iyo Ra’iisul Wasaare Benjamin Netanyahu, iyada oo lagu casuumay madaxweynaha Somaliland in uu booqdo Tel Aviv.

Dowladda Federaalka Soomaaliya, dalalka caalamka intooda badan, iyo ururo caalami ah ayaa si weyn u cambaareeyay aqoonsiga Israa’iil ee Somaliland, iyagoo muujiyay cabsi ku aaddan saameynta uu ku yeelan karo xasiloonida gobolka Geeska Afrika.