Soomaaliya (Dawan) – Xildhibaan Cabdiraxmaan Cabdishakuur Warsame, oo ka tirsan Golaha Shacabka ee Baarlamaanka Federaalka Soomaaliya ahna hoggaamiyaha Xisbiga Wadajir, ayaa gargaar u qaybiyay in ka badan 100 qoys oo ay abaartu saameysay, kuwaas oo barakac ku ah magaalada Muqdisho.
Munaasabadda, oo ay soo qabanqaabiyeen garabka dhalinyarada ee xisbiga, ayaa qoysaska nugul ee ay abaartu saameysay lagu guddoonsiiyay raashin iyo agab kale oo daruuri ah.
Cabdiraxmaan Cabdishakuur Warsame oo ka hadlay goobta ayaa ugu baaqay Soomaalida wax haysata inay garab istaagaan dadka ay saameeyeen dhibaatooyinka jira, isagoo xusay in dadaalladan loogu talagalay xoojinta iskaashiga bulshada iyo in gargaar degdeg ah la gaarsiiyo dadka ay abaartu barakicisay.
Qaybinta gargaarkan ayaa ku soo beegmaysa xilli Soomaaliya ay ka jirto xaalad bini’aadantinimo oo sii xumaanaysa. Sida ay sheegeen Qaramada Midoobay iyo dowladda Soomaaliya, qiyaastii 6.5 milyan oo qof ayaa hadda wajahaya macaluul baahsan.
