Jigjiga (Dawan ) – Dowlad Deegaanka Soomaalida ayaa bilowday hawlgal biyo dhaamin ah oo lagu gaarsiinayo degmooyinka ay saameeyeen abaaraha daba dheeraaday ee ka dhashay isbeddelka cimilada, iyadoo taageero dhaqaale oo dhan $100,000 ay bixisay shirkadda Dahabshiil.
Wasiirka Xafiiska Maareynta Khataraha Masiibooyinka ee Dowlad Deegaanka Soomaalida, Axmed Yaasiin Sheekh Ibraahim, ayaa sheegay in lacagtaasi lagu kireeyay 10 booyadood oo biyo ah, kuwaas oo muddo hal bil ah ka dhaamin doona degmooyin ka mid ah meelaha ay abaartu sida daran u saameysay.
Wasiirka ayaa tilmaamay in hawlgalkan uu qayb ka yahay dadaallada dowladda iyo bulshada ay ku doonayaan in lagu yareeyo saameynta abaarta, gaar ahaan meelaha ay ku nool yihiin bulshada xoolo-dhaqatada ah ee aad ugu nugul isbeddelka cimilada.
“Shirkadda Dahabshiil waxay ku deeqday $100,000, taas oo loogu talagalay in lagu kabo howlaha biyo dhaaminta ee ka socda degmooyinka abaartu saameysay,” ayuu yiri wasiirku, isaga oo hadal ka jeedinayay munaasabad lagu wareejinayay booyadaha biyaha.
