DDS Oo Bilaawday Ololaha lagu talaalayo 1.3 milyan oo xoolo ah

Itoobiya, 9 Oktoobar 2025  — Xafiiska Horumarinta Xoolo-dhaqatada ee Dowlad Deegaanka Soomaalida ayaa Arbacadii diray 11 kooxood oo caafimaad xoolaha ah kuwaas oo ka hawlgalaya lix gobol iyo shan ceel oo waaweyn oo xoolaha laga waraabiyo, iyagoo qayb ka ah olole ballaaran oo lagu horumarinayo caafimaadka xoolaha.

Ololahan ayaa lagu qorsheeyay in lagu daweeyo 404,000 oo xoolo laguna tallaalo 1.3 milyan oo xoolo oo noocyo kala duwan ah. Kooxaha ayaa ka hawlgalaya Bulaale, Sulul, Ceelxaar, Garloogubay, iyo Shiniile, sidoo kale gobollada Jarar, Liibaan, Qoraxey, Afdheer, iyo Nogob. Shan kooxood ayaa diiradda saari doona ceelasha, halka lix kooxoodna ay gaari doonaan 12 degmo oo dheeraad ah.

Cabdiqadir Iiman, Wasiirka Xafiiska Horumarinta Xoolo-dhaqatada DDS, ayaa xusay muhiimada wargelinta bulshada: “Waxaan oran lahaa, aan si wadajir ah u daryeelno caafimaadka xoolaha. Waxaan rabaa shacabka marka ay arkaan xanuun ku faafaya xoolaha in ay degmada ku wargeliyaan si tallaabo degdeg ah loo qaado,” ayuu yiri.

Xafiiska ma uusan sheegin waqtiga rasmiga ee howsha bilaabaneyso inta inta ay soconayso.

Ololahan ayaa mudnaanta siinaya ka hortagga cudurrada, gaar ahaan meelaha ceelasha, si loo ilaaliyo caafimaadka xoolaha, looga hortago faafitaanka cudurrada, isla markaana loo taageero wax-soosaarka xoolaha ee gobolka.

Masuuliyiintu waxay sheegeen in tallaabooyinkan ay gacan ka geysan doonaan ilaalinta nolosha iyo dhaqaalaha bulshooyinka xoolo-dhaqatada oo ku tiirsan xoolaha iyadoo xilli roobaadka deyrta ay dhwodahay taas oo xoolaha ay u nuglaadaan cururrdaa qaarkood .