Waxaa Qoray: Caa'isho Cilmi
Ceelbaraf, Soomaaliya – Dhacdadii lagu laayay todobo ka tirsan Ciidanka Xoogga Dalka Soomaaliyeed (CXDS) Khamiistii, 26-kii Diseembar 2024, ayaa bannaanka soo dhigtay dhibaatooyinka ka sii daraya ee dagaallada qabaa’ilka ee dalka ka jira, kuwaas oo saameyn xooggan ku yeeshay amniga iyo midnimada Soomaaliya.
Ciidamada, oo kasoo laabtay howlgal ay ka sameeyeen degmada Ceelbaraf ee gobolka Shabeellaha Dhexe, ayaa jidka loogu galay iyagoo ku sii jeeday gobolka Hiiraan. Weerarka, oo loo maleynayo in uu salka ku hayo colaado qabaa’il, ayaa sababay dhimashadooda, kadib markii dableyda weerarka geysatay ay ku amreen inay is dhiibaan, kaddibna si arxan darro ah u dileen.
Ballanqaadyada Madaxda Federaalka iyo Hirshabeelle
Dowladda Federaalka Soomaaliya iyo maamulka Hirshabeelle ayaa si kulul u cambaareeyay weerarkan. Wasiirka Gaashaandhigga Soomaaliya, Cabdulqaadir Maxamed Nuur, oo shir jaraa’id ku qabtay Muqdisho, ayaa ballanqaaday in gacanta lagu soo dhigi doono dambiilayaasha:
"Waxaan ku rajo weynahay in 48 saacadood gudahood aan ku soo qaban doono kuwii falkaas ka dambeeyay," ayuu yiri wasiirka, inkastoo wakhtigaasi uu dhaafay iyadoo aan wax war ah laga helin qabashada dambiilayaasha.
Taliyaha Booliska Hirshabeelle, Xasan Dhicisow Xasan, ayaa isna ku nuuxnuuxsaday in maamulkiisu u diyaarsan yahay la shaqeynta dowladda si loo helo dambiilayaasha:
"Ka Hirshabeelle ahaan, waxaan diyaar u nahay inaan tallaabo sharci ah ka qaadno cid walba oo ku lug leh falalkan arxan darrada ah," ayuu yiri.