Dowladda oo sheegtay in la xallin waayay kiiska Cartan ee koobka adduunka

Muqdisho(Dawan)- Wasaaradda Dhallinyarada iyo Isboortiska ee Xukuumadda Federaalka Soomaaliya ayaa sheegtay inay aad uga xun tahay in garsooraha caalamiga ah ee Soomaaliyeed, Cumar Cartan, uu seego ka qeybgalka tartanka kubadda cagta ee caalamiga ah ee dhowaan ka billaabanay dalalka Mareykanka, Canada iyo Mexico.

War-saxaafadeed ay wasaaraddu soo saartay ayaa lagu sheegay in dowladda Soomaaliya ay qaaday dadaallo diblomaasiyadeed oo ballaaran kadib markii la ogaaday in Cartan loo diiday gelitaanka Mareykanka.

Sida lagu sheegay war-saxaafadeedka, Wasaaradda Dhallinyarada iyo Isboortiska ayaa arrintan la kaashatay Wasaaradda Arrimaha Dibadda iyo Iskaashiga Caalamiga ah iyo Madaxtooyada Jamhuuriyadda Federaalka Soomaaliya, iyadoo wada-xaajoodyo lala yeeshay Dowladda Mareykanka iyo hay’adda FIFA.

"Waxay sameysay (Wasaaraddu) dadaallo diblomaasiyadeed iyo wada-xaajood ballaaran oo lala yeeshay Dowladda Mareykanka iyo hay’adda FIFA si xal degdeg ah loogu helo arrintan." ayaa lagu yiri, qoraalka Wasaaradda.

Si kastaba ha ahaatee, wasaaraddu waxay qiratay in inkastoo dadaalladaas la sameeyay aysan suuragelin in xal laga gaaro xaaladda garsooraha Soomaaliyeed.

"Nasiib darro, inkastoo dadaalladaas xooggan la sameeyay, ma suuragelin in xal laga gaaro."

Wasaaradda ayaa ku tilmaantay Cumar Cartan mid ka mid ah astaamaha guusha iyo kartida dhallinyarada Soomaaliyeed, iyadoo sheegtay inuu ku matalay sumcadda iyo sharafka Soomaaliya ee fagaarayaasha caalamiga ah.

"Garsoore Cumar Cartan wuxuu tusaale muuqda u yahay kartida, adkeysiga iyo dadaalka dhallinyarada Soomaaliyeed."

Waxay sidoo kale xustay in guulaha uu gaaray ay caddeyn u yihiin in duruufaha adag ee dalka ka jira aysan hor istaagi karin himilooyinka iyo horumarka ay gaari karaan dhallinyarada Soomaaliyeed.

"Guulihiisa caalamiga ahaa waxay sharaf iyo sumcad u yihiin shacabka Soomaaliyeed, waxayna caddeynaysaa in caqabadaha iyo duruufaha adag ee dalka ka jira aysan hor istaagin in dhallinyarada Soomaaliyeed ay gaaraan heerar sare oo caalami ah."

Dhanka kale, Wasaaradda Dhallinyarada iyo Isboortiska ayaa mar kale xaqiijisay inay sii wadi doonto taageerada ay siiso garsooraha Soomaaliyeed, iyadoo tilmaantay inay garab istaagi doonto horumarintiisa xirfadeed iyo ka faa’iideysiga fursadaha caalamiga ah ee mustaqbalka.

Dhacdadan ayaa sii xoojisay doodda ku saabsan saameynta xayiraadaha socdaalka ee saaran muwaadiniinta Soomaaliyeed, kuwaas oo mararka qaar saameeya ka qeybgalka fursadaha caalamiga ah ee dhinacyada ciyaaraha, waxbarashada iyo howlaha kale ee matalaadda dalka.