Baydhabo (Dawan) – In ka badan 150 dagaalame oo taageersanaa madaxweynihii hore ee Dowlad Goboleedka Koonfur Galbeed, Cabdicasiis Xasan Maxamed Laftagareen, ayaa isku soo dhiibay ciidamada Dowladda Federaalka Soomaaliya ee ku sugan Gobolka Baay, sida ay sheegtay Wasaaradda Gaashaandhigga Soomaaliya.
Dadka isa soo dhiibay oo uu hoggaaminayay guddoomiyihii hore ee deegaanka Awdiinle, Ibraahim Maxamed Nuur Kalaay, ayaa la sheegay inay ciidamada dowladda ku wareejiyeen hub kala duwan iyo gaadiid dagaal oo ay wateen.
Wasaaradda Gaashaandhigga ayaa sheegtay inay ka tanaasuleen dhaqdhaqaaqyadii hubeysnaa, isla markaana ay go'aansadeen inaysan qayb ka sii ahaan dagaallada siyaasadeed ee ka socda deegaannada Gobolka Baay.
Dowladdu waxay sidoo kale sheegtay inay socdaan wadahadallo lagu qancinayo ciidamo kale oo weli taageersan Laftagareen inay hubka dhigaan, kuna soo biiraan ciidamada dowladda ama dib ugu laabtaan nolosha bulshada.
