Soomaaliya, 17 Nofeembar 2025 — Dowladda Soomaaliya ayaa sheegay in ciidanka xoogga dalka ay fulyeen howlgal habeenimo oo ka dhacay deegaanka Moora-Gaabeey, oo qiyaastii 37 km u jira magaalada Xudur ee gobolka Bakool, kaas oo lagu dilay ugu yaraan saddex askari oo ka tirsan al-Shabaab, halka in ka badan toban kalena lagu dhaawacay.
Sida lagu sheegay war kasoo baxay dowladda oo ay baahisay Telefishinka Qaranka (SNTV), howlgalka waxaa lagu tilmaamay “mid qorsheysan oo si gaar ah loo bartilmaameedsaday,” waxaana hoggaaminayay Guutada 9-aad ee qeybta 60-aad.
“Howlgalka oo si xeeladeysan loo diyaariyay, waxaa lagu dilay in ka badan saddex dhagarqabe, halka in ka badan toban xubnood oo ka tirsan maleeshiyada Khawaarijta lagu dhaawacay,” ayaa lagu yiri bayaanka dowladda.
