DP World oo sheegtay in go’aanka Soomaaliya uusan saameyn doonin howlaheeda Berbera

Dubai, 14 Janaayo 2026 (Dawan)— Shirkadda dekedaha iyo saadka ee DP World, oo laga leeyahay Imaaraadka Carabta, ayaa sheegtay in khilaafka u dhexeeya Dowladda Federaalka Soomaaliya iyo Imaaraadka Carabta inuusan saameyn ku yeelan doonin howlaha ay ka waddo Dekedda Berbera.

Bayaan ay shirkaddu la wadaagtay wakaaladda wararka Reuters Talaadadii, ayay DP World ku caddeysay in hawlaheeda ka socda Somaliland ay weli si caadi ah u socdaan, isla markaana ay ku saleysan yihiin heshiisyo hore oo sharci ah.

“DP World waxay diiradda saareysaa hawlgal ammaan ah oo hufan oo dekedda ah, iyadoo ujeeddadu tahay fududeynta ganacsiga iyo keenista faa’iidooyin dhaqaale oo u gaara ah Somaliland iyo guud ahaan gobolka Geeska Afrika,” ayaa lagu yiri bayaanka shirkadda.

Hadalkan ayaa imaanaya xilli Dowladda Federaalka Soomaaliya ay Isniintii ku dhawaaqday inay gabi ahaanba baabi’isay dhammaan heshiisyadii la xiriiray dekedaha iyo iskaashiga amniga ee ay la lahayd Imaaraadka Carabta, iyadoo ku sababeysay ilaalinta madax-bannaanida iyo midnimada dhuleed ee dalka.

Dhanka kale, Somaliland ayaa horay u sheegtay in go’aanka dowladda dhexe ee Soomaaliya uusan quseynin heshiisyada ay iyadu la gashay shirkadaha caalamiga ah, isla markaana Muqdisho aysan wax saameyn ah ku lahayn qandaraasyadaas.

DP World ayaan wax faahfaahin ah ka bixin mowqifkeeda ku aaddan heshiisyada kale ee ay kula jirtay Dowlad Goboleedyada Puntland iyo Jubaland, kuwaas oo iyaguna si cad uga hor yimid go’aanka ay qaadatay Dowladda Federaalka Soomaaliya.

Imaaraadka Carabta ayaa sannadihii la soo dhaafay xoojiyay xiriirradiisa dhaqaale iyo amni oo uu la yeeshay Somaliland, iyadoo tiirka ugu weyn ee istaraatiijiyaddaasi uu yahay maalgelin dhan 442 milyan oo dollar, taas oo DP World ku horumarinayso kuna maamuleyso Dekedda Berbera.

Go’aanka Soomaaliya ayaa sidoo kale yimid xilli ay jireen baaritaanno ay dowladdu ku sameyneyso arrimo la xiriira dhaqdhaqaaqyo siyaasadeed iyo amni oo lagu eedeeyay in ay si qarsoodi ah uga dhaceen gudaha dalka, taas oo sii hurisay xiisadda u dhaxeysa Muqdisho iyo Abu Dhabi.