Sanca (Dawan)- Kooxda Xuuthiyiinta ee dalka Yemen ayaa sheegtay in dowladda Eritrea ay soo daysay 23 kalluumeysato Yemeniyiin ah kuwaas oo muddo 10 maalmood ah ku xirnaa gudaha Eritrea.
23-da qof ee kalluumaysatada ah ayaa ku soo laabtay dekedda magaalada Xudeydah ee ku taal badda cas ka dib markii in ka badan toban maalmood ay ku jireen gacanta Eritrea, sida laga soo xigtay wakaaladda wararka Saba ee ay maamulaan Xuutiyiintu.
Kooxda Xuutiyiinta ayaa ku eedeysay dowladda Eritrea in ay si xun ula dhaqantay kalluumaysatada iyada oo loo gaystay jirdil, sida ay kooxdu sheegtay.
Wakaalladda oo soo xiganeysa kalluumeysatada ayaa sheegtay in Ciidamada ilaalada badda ee Eritrea ayaa qabteen kadibna ay u taxaabeen xabsiga maalintii labaad ee Ciidul Adxaa, xilli ay ku guda jireen howlahooda kalluumeysi ee xeebaha Yemen.
