Addis Ababa (Dawan) — Shirkadaha Ethio Telecom, Djibouti Telecom iyo Sudatel Group ayaa qaaday tallaabo cusub oo mashruuca Horizon Fiber loogu diyaarinayo inuu bilaabo adeeg ganacsi. Mashruuca ayaa ah shabakad fiilooyin internet oo dhulka mara, waxaana loogu talagalay in lagu sameeyo xiriir internet oo degdeg ah oo u dhexeeya Jabuuti, Itoobiya iyo Suudaan.
Shirkadahan ayaa magaalada Addis Ababa ku qabtay kulan ay ka qayb galeen shirkado waaweyn oo dhinaca internet-ka, teknoolojiyadda iyo adeegyada xogta ah. Kulanka waxaa looga hadlay sida mashruuca loo dhammeystiri karo iyo adeegyada laga bixin karo.
Horizon Fiber wuxuu isku xiri doonaa xarumaha ay fiilooyinka internet-ka ee badda hoosteeda mara ku soo degaan ee Jabuuti iyo Port Sudan, isagoo sii mari doona Itoobiya.
Sida ay sheegtay Ethio Telecom Arbacadii, mashruuca waxaa loo dhisay si uu u yeesho waddooyin kale oo kayd ah, taas oo ka caawinaysa in adeegga internet-ku sii shaqeeyo haddii ay cilad ku timaaddo waddada ugu weyn. Mashruucu wuxuu shirkadaha isgaarsiinta iyo kuwa bixiya adeegyada internet-ka siin karaa marin kale oo internet oo xawaare sare leh, taas oo yareyn karta ku-tiirsanaanta fiilooyinka badda hoosteeda mara ee isku xira dalalka ku teedsan Badda Cas.
Kulanka waxaa ka qayb galay shirkado ay ka mid yihiin Google, Meta, Microsoft, Amazon Web Services (AWS), Airtel Africa, Bayobab, WIOCC, center3 iyo China Mobile International, iyo shirkadaha teknoolojiyadda ee Ciena, Nokia iyo BringCom.
