Muqdisho (Dawan) – Madaxweynihii hore ee Soomaaliya, Maxamed Cabdullaahi Farmaajo, ayaa Madaxweynaha Jamhuuriyadda Federaalka Soomaaliya, Xasan Sheekh Maxamuud, ku casuumay kulan uu sheegay in looga hadli doono jihada geeddi-socodka doorashada dalka iyo sidii heshiis looga gaari lahaa arrimaha la xiriira doorashooyinka.
Farmaajo ayaa hadalkan ka sheegay shir jaraa’id oo ay maanta si wadajir ah magaalada Muqdisho ugu qabteen isaga iyo madaxweynihii hore ee Soomaaliya, Shariif Sheekh Axmed.
Madaxweynihii hore ayaa sheegay inuu si rasmi ah martiqaad ugu fidinayo Madaxweyne Xasan Sheekh Maxamuud si ay uga wada hadlaan arrimaha doorashada, isla markaana ay uga gaaraan is-afgarad ku saabsan hannaanka lagu wajahayo geeddi-socodka siyaasadeed ee dalka.
“Waxaan waydiisaneynaa Madaxweynaha inuu nala fariisto. Aniga ayaa martiqaadaya, gurigeyga ayaana ku martiqaadaya annagoo saddex madaxweyne ah, si aan uga wada hadalno qaabka ay doorashadu u dhaceyso,” ayuu yiri Farmaajo.
Sida uu sheegay, kulankaasi ayaa lagu wadaa inuu ka dhaco hoygiisa magaalada Muqdisho maalinta Isniinta oo ku beegan 8-da Juun, saacadda 11:30-ka barqanimo.