Jabuuti, Maarso 10, 2026 (Dawan)– Madaxweynaha Jabuuti Ismaaciil Cumar Geelle ayaa si rasmi ah u gudbiyay codsiga musharraxnimadiisa doorashada madaxtinnimada ee la filayo inay qabsoonto bisha Abriil, isagoo doonaya inuu sii kordhiyo 27 sano oo uu xukunka hayay, sida ay sheegtay Wakaaladda Wararka Jabuuti (ADI).
Codsiga musharraxnimada ayaa Isniintii loo gudbiyay Wasaaradda Arrimaha Gudaha, waxaana gudbiyay Cabdalla Cabdalla Miguil, oo ah maareeyaha ololaha ee isbahaysiga talada haya ee Isbahaysiga Aqlabiyadda Madaxweynaha (UMP).
“Gudbintan waxay si rasmi ah u xaqiijineysaa ka qaybgalka Geelle ee doorashada madaxtinnimada ee Abriil 2026, taas oo go’aamin doonta madaxa dawladda ee shanta sano ee soo socota,” ayaa lagu yiri bayaan ka soo baxay madaxtooyada.
Sida ku cad jadwalka doorashada ee ay dhowaan soo saartay wasaaraddu, Golaha Dastuuriga ah ayaa laga sugayaa inuu codsiyada la xaqiijiyay u soo celiyo Wasaaradda Arrimaha Gudaha ugu dambayn 15-ka Maarso, halka liiska rasmiga ah ee musharraxiinta la ansixiyay la qorsheeyay in lagu dhawaaqo 16-ka Maarso.