Muqdisho (Dawan)– Maamulka Gobolka Banaadir ayaa ka digay khatarta ka dhalan karta bulaacadaha sida khaldan loogu shubo ceelasha dhulka hoostiisa, isagoo sheegay in arrintani ay halis ku tahay biyaha dhulka hoostiisa, caafimaadka bulshada iyo deegaanka magaalada Muqdisho.
Agaasimaha Waaxda Biyaha iyo Deegaanka ee Maamulka Gobolka Banaadir, Mahad Baraawe, ayaa wareysi uu siiyay Telefishinka Qaranka Soomaaliya ku sheegay in maamulka uusan aqbali doonin in dhismayaasha waaweyn iyo guryaha dabaqyada ah ay yeeshaan nidaamyo bulaacado oo aan waafaqsanayn habraacyada ilaalinta deegaanka.
Waxa uu sheegay in aan la qodi karin ceel cusub iyada oo aan fasax rasmi ah laga helin Maamulka Gobolka Banaadir, isagoo xusay in ceel kasta oo aan fasax lahayn loo aqoonsan doono mid sharci-darro ah, tallaabana laga qaadi doono cidda qodday ama isticmaasha.
Agaasimaha ayaa sidoo kale sheegay in baaritaanno lagu sameyn doono ceelashii hore loo qoday iyo kuwa hadda la qodayo, si loo hubiyo inaysan waxyeello u geysan biyaha dhulka hoostiisa iyo caafimaadka dadka ku nool magaalada.
