Muqdisho (Dawan)— Agaasinka Waxbarashada Gobolka Banaadir ayaa shaaciyay liiska 50 dugsi dadweyne oo bixiya waxbarasho bilaash ah, isagoo waalidiinta ku boorriyay inay carruurtooda ka diiwaangeliyaan dugsiyadaas. Agaasinka ayaa sheegay Isniintaan manata ah in waalidiinta doonaya waxbarasho lacag la’aan ah ay carruurtooda ka diiwaangelin karaan mid ka mid ah dugsiyada ku jira liiska uu soo bandhigay.
Liiska ayaa la shaaciyay xilli sannad-dugsiyeedka 2026/2027 uu hadda bilaabmay. Agaasinka Waxbarashada Banaadir, ayaa soo bandhigay jadwalka sannad-dugsiyeedka cusub, kaas oo hagaya hawlaha waxbarashada iyo dugsiyada. Dugsiyada ku jira liiska Agaasinka ayaa ku kala yaalla degmooyin kala duwan oo ka tirsan Gobolka Banaadir, waxaana ka mid ah dugsiyo ku yaalla Hodan, Howlwadaag, Wadajir, Warta Nabadda, Yaaqshiid, Kaaraan, Shibis, Heliwaa, Dayniile, Dharkenley, Garasbaaley, Gubadley, Boondheere iyo Cabdicasiis.
Tallaabadan ayaa ku soo beegmaysa iyadoo maamulka Banaadir uu sanadkan kordhinayo taageerada dugsiyada dadweynaha. Bishii Maarso, Guddoomiyaha Gobolka Banaadir ahna Duqa Muqdisho Xasan Maxamed Xuseen Muungaab ayaa sheegay in maamulka uu saxiixay lacag ku dhow $300,000 oo loogu talagalay horumarinta dugsiyada gobolka sannad-dugsiyeedkiiba.
Taageeradaas ayaa lagu sheegay inay xoojinayso 48 dugsi dadweyne oo bixiya waxbarasho bilaash ah, iyadoo dowladda federaalkuna ay sii waddo bixinta mushaharka macallimiinta.
Arrintan ayaa qeyb ka ah dadaallo ballaaran oo lagu kordhinayo helitaanka waxbarashada Soomaaliya. Mas’uuliyiinta waxbarashada federaalka, dowlad-goboleedyada iyo Banaadir ayaa bishii Agoosto isku raacay in la xoojiyo baahinta waxbarashada, tayadeeda iyo maamulka nidaamka waxbarashada dalka.
