Soomaaliya, 1 Diisambar 2025 – Golaha Mihnadleyaasha Caafimaadka Qaranka (NHPC) ee Soomaaliya ayaa soo dhaweeyay go’aan ka soo baxay Maxkamadda Sare oo buriyay magacaabiddii Wasaaradda Caafimaadka ay u samaysay Xoghayaha Guud ee cusub, taasoo dib u xaqiijinaysa madaxbannaanida golaha.
Maxkamadda Sare, xukunkeedii ay ku dhawaaqday 27-kii Noofambar 2025, waxay ku burisay go’aankii wasaaradda ee ahaa 29-kii Maajo 2025, kaasoo ahaa in loo magacaabay Maxamed Maxamuud Aadow inuu noqdo Xoghayaha Guud. Maxkamaddu waxay go’aamisay in Wasaaradda Caafimaadku aanay lahayn awood sharci ah oo ay ku samayso magacaabiddaas, waxayna ku amartay inay bixiso $300 oo ah kharashka dacwadda, iyadoo fulinteeda loo baahan yahay 30 maalmood gudahood.
Goluhu wuxuu ka kooban yahay 15 xubnood. Xubnaha waxaa laga soo xulay wasaaradaha dowladda—oo ay ku jiraan Caafimaadka, Waxbarashada, iyo Caddaaladda—sidoo kale ururada xirfadlayaasha, adeegyada caafimaadka gaarka ah, iyo bulshada rayidka ah. Guddoomiyaha iyo Guddoomiye Ku-Xigeenka waxaa gudaha kooda ka soo doorta xubnaha golaha.
Sida lagu sheegay qoraalka Maxkmadda Dacwadda, oo goluhu xareeyay 2-dii Luulyo 2025, waxay daba socotay tilmaam ka timid Xafiiska Xeer Ilaaliyaha Guud (Attorney General’s office), kaas oo caddeeyay in goluhu u shaqeeyo si madaxbannaan oo aanay Wasaaraddu lahayn awood ay ku magacowdo Xoghayaha Guud.
