Golaha Mustaqbalka oo ka horyimid jadwalka Doorashooyinka 2027

Muqdisho (Dawan) -Golaha Mustaqbalka Soomaaliyeed ayaa si rasmi ah uga horyimid jadwalka doorashooyinka labada Aqal ee Baarlamaanka Federaalka Soomaaliya iyo doorashada Madaxweynaha Jamhuuriyadda Federaalka Soomaaliya, kaas oo uu dhowaan shaaciyay Guddiga Madaxa-bannaan ee Doorashooyinka.

War-saxaafadeed uu Goluhu soo saaray caawa, shan maalmood kaddib markii jadwalka la shaaciyay, ayuu ku caddeeyay inuu si buuxda u diiddan yahay qorshaha doorashooyinka ee guddigu soo bandhigay.

Golaha ayaa ka digay in ku dhawaaqista jadwalkaasi ay horseedi karto kala qaybsanaan siyaasadeed iyo in dalka ay ka hirgalaan hannaano doorasho oo is barbar socda.

Guddiga Madaxa-bannaan ee Doorashooyinka ayaa shan maalmood ka hor shaaciyay jadwalka doorashooyinka, kaas oo dhigaya in doorashada labada Aqal ee Baarlamaanka Federaalka la qabto 15-ka Abriil 2027, halka doorashada Madaxweynaha Soomaaliya loo asteeyay 15-ka May 2027.

Doorashooyinkaas ayaa la qorsheeyay in lagu qabto nidaamka qof iyo cod, kaas oo muwaadiniintu si toos ah codkooda ugu dooranayaan xildhibaanada labada Aqal ee Baarlamaanka Federaalka Soomaaliya

Diidmada Golaha Mustaqbalka Soomaaliyeed ayaa muujinaysa khilaafka siyaasadeed ee ka taagan jadwalka doorashooyinka, iyadoo weli loo baahan yahay in la caddeeyo sida dhinacyada siyaasadeed ay uga heshiin karaan hannaanka iyo waqtiga doorashooyinka soo socda.