Muqdisho (Dawan)- Baarlamaanka Federaalka Soomaaliya ayaa dib u bilaabaya fadhiyadiisa 1-da Agoosto, kaddib markii uu soo dhammaaday fasaxii caadiga ahaa ee baarlamaanka, sida maanta oo Axad ah uu sheegay hoggaanka labada aqal ee Baarlamaanka Federaalka.
Hoggaanka Golaha Shacabka iyo Aqalka Sare ayaa ku heshiiyay taariikhda dib u furitaanka kaddib wada-tashi ay yeesheen, waxaana ay ugu baaqeen xildhibaannada Golaha Shacabka iyo senatarada Aqalka Sare inay ku soo laabtaan magaalada Muqdisho ka hor furitaanka kalfadhiga siddeedaad ee Baarlamaanka 11-aad ee Federaalka.
Hoggaanka baarlamaanka ayaa sheegay in dib u furitaanka fadhiyada uu xildhibaannada u oggolaanayo inay sii wataan waajibaadkooda dastuuriga ah, hase yeeshee ma aysan shaacin ajande faahfaahsan oo ku saabsan qodobada looga hadli doono kalfadhigan.
Dib u furitaanka baarlamaanka ayaa ku soo beegmaya xilli ay dhammaatay muddadii afarta sano ahayd ee lagu soo dhisay Baarlamaanka Federaalka ee hadda jira.
