Goorma ayaa loo asteeyay doorashada Hirshabeelle?

Hirshabeelle (Dawan) – Guddiga Madaxa-bannaan ee Doorashooyinka Qaranka iyo Soohdimaha Soomaaliya (NIEBC) ayaa ku dhawaaqay jadwalka rasmiga ah ee doorashada Dowlad Goboleedka Hirshabeelle, iyada oo 20-ka Agoosto loo asteeyay maalinta ay dhici doonto doorashada Golaha Wakiillada iyo goleyaasha deegaanka ee maamulkaas.

Sida ku cad jadwalka, diiwaangelinta musharraxiinta iyo gudbinta dokumentiyada tartanka ayaa bilaaban doonta 5-ta Agoosto.

Hubinta in musharraxiintu buuxiyeen shuruudaha looga baahan yahay iyo kala caynta deegaannada doorashada ayaa la qaban doonaa 7-da Agoosto, waxaana xigi doona soo saarista liiska hordhaca ah ee musharraxiinta 8-da Agoosto.

Xisbiyada siyaasadda ayaa looga baahan yahay inay guddiga u gudbiyaan magacyada wakiilladooda ka hawlgeli doona goobaha codbixinta ugu dambayn 11-ka Agoosto.

Guddigu wuxuu dib u eegi doonaa isla markaana ansixin doonaa liisaska kama dambaysta ah ee musharraxiinta Golaha Wakiillada iyo goleyaasha deegaanka ugu dambayn 15-ka Agoosto, ka hor inta aan la soo saarin liiska rasmiga ah ee musharraxiinta la ansixiyay 16-ka Agoosto.

Liiska kormeerayaasha xisbiyada siyaasadda ayaa la shaacin doonaa 18-ka Agoosto, iyadoo loo gogol xaarayo codbixinta dhici doonta 20-ka Agoosto, si waafaqsan jadwalka doorashada ee la shaaciyay.

Guddiga Doorashooyinka ayaa sheegay in jadwalkani uu qayb ka yahay diyaar-garowga lagu qabanayo doorashada Hirshabeelle iyadoo la raacayo hannaanka doorasho ee la ansixiyay.