Muqdisho (Dawan)– Guddiga Madaxa-bannaan ee Doorashooyinka Qaranka iyo Soohdimaha ayaa Baarlamaanka Soomaaliya ka dalbaday in dib-u-eegis lagu sameeyo qaar ka mid ah qodobbada Sharciga Doorashooyinka Qaranka, kuwaas oo uu Guddigu sheegay inay caqabado farsamo kala kulmeen hirgelintooda, sida uu sheegay Guddiga Madaxa-bannaan ee Doorashooyinka Qaranka iyo Soohdimaha.
Guddoomiyaha Guddiga Madaxa-bannaan ee Doorashooyinka Qaranka iyo Soohdimaha, Cabdikariim Axmed Xasan, oo ay weheliyaan Guddoomiye ku-xigeenka Guddiga Saadaq Abshir Garaad, xubno ka tirsan Guddiga iyo Xoghayaha Guud, ayaa Shalay kulan la qaatay Guddoomiyaha Golaha Shacabka Cabdulqaadir Maxamed Nuur Jaamac iyo Guddiga Arrimaha Gudaha ee Golaha Shacabka.
Intii uu socday kulanka, Guddiga ayaa Golaha Shacabka uga warbixiyay hawlihii u qabsoomay tan iyo markii la dhisay, kuwaas oo ay ka mid yihiin doorashooyinkii goleyaasha deegaanka Gobolka Banaadir, doorashooyinkii isku-sidkanaa ee Koonfur Galbeed iyo doorashooyinkii Galmudug ee markii dambe ay Maxkamadda Sare laashay.
Guddiga ayaa sidoo kale soo bandhigay caqabadaha farsamo ee ka dhashay hirgelinta qaar ka mid ah qodobbada Sharciga Doorashooyinka Qaranka, iyagoo Baarlamaanka la wadaagay soo jeedinno ku saabsan wax-ka-beddel lagu sameeyo qodobbadaas.
