Addis Ababa (Dawan)– Guddoomiyaha Guddiga Midowga Afrika, Maxamuud Cali Yuusuf, ayaa Soomaaliya ku bogaadiyay ansixinta heshiiska Aagga Ganacsiga Xorta ah ee Qaaradda Afrika (AfCFTA), isagoo sheegay in tallaabadani ay muhiim u tahay xoojinta doorka Soomaaliya ee suuqa ganacsi ee Afrika, sida uu sheegay Midowga Afrika.
Guddoomiyaha ayaa hadalkan ka sheegay kulan uu xarunta Midowga Afrika ee Addis Ababa kula yeeshay Wasiirka Ganacsiga iyo Warshadaha Soomaaliya, Jamaal Maxamed Xasan, oo booqasho shaqo ku tagay xarunta ururka.
Guddoomiyaha ayaa sheegay in ansixinta heshiiska AfCFTA ay Soomaaliya ka caawin doonto inay si weyn ugu dhex milanto suuqa qaaradda Afrika, isla markaana ay ka qayb qaadato himilooyinka isku-dhafka dhaqaale ee Afrika.
Waxa uu tilmaamay in Soomaaliya ay leedahay fursado dhaqaale oo muhiim ah, gaar ahaan ganacsiga, maalgashiga iyo xiriirrada ganacsi ee taariikhiga ah ee ay la leedahay qaaradda iyo dalal ka baxsan Afrika.
