Guudlaawe oo amar ku bixiyay in loo diyaar-garoobo doorasho qof iyo cod

Jowhar (Dawan) — Madaxweynaha Dowlad Goboleedka Hirshabelle, Cali Cabdullaahi Xuseen (Cali Guudlaawe), ayaa faray Golaha Wasiirrada inay sameeyaan diyaar-garow xooggan oo ku aaddan hirgelinta doorasho qof iyo cod, sida lagu sheegay bayaan ka soo baxay Madaxtooyadda.

Guudlaawe ayaa hadalkan jeediyay intii uu shir-guddoominayay kulan degdeg ah oo ay yeesheen Golaha Wasiirrada, kaas oo diiradda lagu saaray arrimaha doorashooyinka iyo xaaladaha guud ee maamulka.

“Doorasho waa qof iyo cod, xisbigana waa JSP,” ayuu yiri madaxweynaha, sida lagu sheegay bayaanka.

Tallaabadan ayaa imanaysa iyadoo Guddiga Madaxa-bannaan ee Doorashooyinka Qaranka iyo Soohdimaha Khamiistii la soo dhaafay shaaciyey in doorashooyinka Hirshabelle la qaban doono 13-ka May.

Guddiga ayaa sidoo kale sheegay in diyaar-garowga doorashooyinka uu marayo heer gabagabo ah, iyadoo la dhameystiray diiwaangelinta codbixiyeyaasha, qaybinta kaararka aqoonsiga, dejinta goobaha codbixinta iyo tababarka shaqaalaha ku-meel-gaarka ah.

Madaxweynaha ayaa ugu baaqay shacabka inay si firfircoon uga qeyb qaataan hannaanka doorasho ee dalka, isagoo ku dhiirrigeliyay inay door muuqda ka qaataan.