Halkee ayuu kaga jiraa Deegaanka Soomaalidu miisaaniyadda Itoobiya?

Sidoo kale, deegaanka Soomaalidu wuxuu door muhiim ah ku leeyahay dhaqaalaha xoolaha nool ee Itoobiya oo ka mid ah ilaha ugu waaweyn ee laga helo lacagaha qalaad, isagoo sidoo kale ah marin muhiim u ah ganacsiga xuduudaha ka gudba iyo isdhexgalka dhaqaale ee gobolka Geeska Afrika.

Miisaaniyaddan ayaa kusoo beegmaysa xilli dowladda Itoobiya ay waddo dib-u-habeyn dhaqaale oo ballaaran oo uu hoggaaminayo Ra’iisul Wasaaraha Itoobiya, Abiy Axmed, taasoo ay ku jiraan dib-u-habeynta nidaamka lacagta, suuqa sarifka iyo tallaabooyin ay taageerayaan hay’adaha maaliyadeed ee caalamiga ah.

Dhanka kale, dukumiintiyada miisaaniyadda ayaa muujinaya in bixinta deymuhu ay weli tahay kharashka ugu weyn ee dowladda Itoobiya. Dowladda ayaa u qoondeysay 542.1 bilyan oo Birr bixinta deynta gudaha iyo tan dibadda, taasoo ka dhigan in ka badan 43% kharashaadka joogtada ah ee sanadka maaliyadeed ee soo socda.

Inkastoo ay jiraan culaysyo deyneed oo waaweyn, haddana dowladda Itoobiya iyo hay’adaha maaliyadeed ee caalamiga ah ayaa saadaalinaya koboc dhaqaale oo xooggan. Waxaa la filayaa in dhaqaalaha Itoobiya uu kobco 9.3% sanadkan, halka dowladda Itoobiya ay rajaynayso koboc ka badan 10%, taasoo dalka ka dhigi karta mid ka mid ah dhaqaalaha ugu koboca badan caalamka.

Mas’uuliyiinta Itoobiya ayaa aaminsan in sii socoshada dib-u-habeynta dhaqaalaha, maalgashiga kaabayaasha iyo kobcinta doorka ganacsiga gaarka loo leeyahay ay sii xoojin doonaan kobocaas, iyadoo deegaanka Soomaalidana la filayo inuu door weyn ku yeesho istaraatiijiyadda horumarinta muddada dheer ee dalka.