Hogaamiyaha ay Israel ugu necbeed.. Waa kuma Xasan Nasrallah?

Beirut (Dawan)- Afhayeen u hadlay ciidamada Israel ayaa sheegay in Xasan Nasrallah, oo ahaa xoghayihii guud ee ururka Xisbullaah ee Lubnaan lagu dilay duqayn ka dhacday duleedka koonfureed ee Beirut.

Nasrallah ayaa lagu dilay duqeymo xoog badan oo aan horay loo arag kuwaas oo fiidnimadii Jimcaha ay diyaaradaha F-35 ee Israel ku qaadeen xaafadda Haret Hreik, oo ah xarunta ugu weyn ee Xisbullaah ee koonfurta Beirut.

Wax yar ka dib weeraradaasi, afhayeenka ciidamada Israel, Daniel Hagari ayaa sheegay in weerarka lala beegsaday xarunta ugu weyn ee Xisbullah, isaga oo intaas ku daray in la bartilmaameedsaday xarumo lagu keydiyo hubka

Xisbullah ayaa xaqiijiyay dilka hogaamiyihii ururka Xasan Nasrallah oo lagu dilay weerar cirka ah oo Israel ay ka geysatay Beirut fiidnimadii Jimcaha.

Nasrallah waxa uu muddo dheer bartilmaameed u ahaa Israel , iyada oo u aragtay inuu ahaa mid ka mid ah cadawga ugu waaweyn ee ay leedahy Tel Aviv.

Israel ayaa dhowr jeer isku dayday inay ku disho iskahorimaadyo hubeysan oo horay u dhacay laakiin dhammaantood waa ay ku guuldareystay .

Nasarallah waxa uu Mareykanka ugu jiray liiska argagixisada caalamiga ah tan iyo 1995-kii waxaana madaxiisa la dul dhigay abaal-marin lacageed oo dhan 10 milyan oo dollar.

Waa kuma Xasan Nasrallah?

Waxa uu ku biiray dhaqdhaqaaqyadii siyaasadeed ee Amal isaga oo xubin ka nqoday xafiiska siyaasadda 1979.

Kadib khilaaf soo kala dhax galay ururkaas wuu isaga tegay waxa uuna ku biiray sannadkii 1982-kii, ururka Xisbullah oo xilligaas ahaa urur cusub.

Sannadkii 1985-kii, Nasrallah wuxuu u guuray caasimadda Beirut wuxuuna noqday ku xigeenka madaxa gobolka. Ka dib, waxa uu la wareegay madaxa fulinta, iyada oo loo xilsaaray fulinta go'aamadii Golaha Shuurada ee ururka.

Hoggaaminta Xisbullah

Nasrallah wuxuu noqday xoghayaha guud ee Xisbullah 16-kii Feberaayo, 1992-kii, kaddib markii Isarel duqeyn ku dishay hoggaamiyihii isaga ka horreeyay Cabbaas Al-Musawi.

Nasrallah waxa uu xoojiyay howlgalladdii ururka ee ka dhanka ahaa Israel taas oo keentay inay ciidamadeeda kala baxdo koonfurta Lubnaan sannadkii 2000 kaddib 22 sano oo ay haystay.

Sannadkii 2004-tii, waxa uu kaalin muhiim ah ka qaatay wada-xaajoodkii soo deynta maxaabiis ay haysatay Isarel kuwaaas oo isagu jiray muwaadiniin Lubnaan ah iyo kuwa kale oo Carab ah.

Doorkii uu ku lahaa xaqiijinta ka bixista Israel ee koonfurta Lubnaan waxa uu ku mutaystay magaca “hogaamiyaha iska caabinta,” wuxuuna magaciisa kor usii kacay dagaalkii dambe ee Israel la gashay Xisbullaahi sannadkii 2006.

Xasan Nasrallah waxa uu ku dhashay tuulada Bazouriyeh ee koonfurta Lubnaan bishii Agoosto 31, 1960.

Waxa uu aroosay Faadumo Yaasiin, waxayna isku dhaleen shan carruur ah: Haadi, Seynab, Maxamed Jawaad, Maxamed Mahdi, iyo Maxamed Ali.

Curadkiisii Haadi, waxa lagu dilay dagaal dhexmaray ciidamada Israel 1997kii.

Nasrallah waxa uu waxbarashada culuumta diiniga ah ka qaatay machadyada Shiicada ee Lubnaan, Ciraaq iyo Iran.

Qudbadihiisa xammaasadda leh iyo inuu caan ku ahaa ka hadalka arrimaha Falastiin waxay usii kordhiyeen inuu magac weyn ku yeesho caalamka Carabta iyo dunida Islaamka.

Si kastaba ha ahaatee, magaca Nasrallah ayaa hoos u dhacay kadib markii xisbigiisu taageeray Madaxweynaha Suuriya markii dalkaas uu ka billowday kacankii looga soo horjeeday maamulka dalkaas 2011-kii.

Mar kale waxa uu magaciisu soo labakacleeyay markii uu billowday dagaalka Gaza sanadkii hore ee 2023, isaga oo ku dhawaaqay inay garabtaaganyihiin kooxaha iska caabinta Falastiiniyiinta.

Dilkiisa ayaa ku soo beegmaya iyadoo Faransiiska iyo Mareykanku ay kordhiyeen dadaallada lagu dhexdhexaadinayo xabbad-joojin ku meel gaar ah oo 21 maalmood ah oo dhexmarta Israel iyo Xisbullah, ujeeddadeeduna tahay in loo gogol xaaro xal diblomaasiyadeed oo lagu joojinayo dagaallada ka socda Lubnaan iyo Gaza.

Hogaamiyaha ay Israel ugu necbeed.. Waa kuma Xasan Nasrallah?

Golaha Mustaqbalka oo ka horyimid jadwalka Doorashooyinka 2027

Yaa noqonaya Musharraxa JSP ee Hoggaamiye Ku-xigeenka Galmudug?

Soomaaliya oo si dirqi ah looga qaaday Koobka CECAFA U-17

Madaxweynaha Hirshabelle oo xilka ka qaaday Gudoomiyaha Gobolka Hiiraan Maxamed Xuseen

Maqaallo La Xidhiidha

Dowladda Soomaaliya oo hakisay qaadashada Macalimiinta cusub ee Sanadkaan

Doorashooyinkii Deegaanka iyo gogol-xaarka Doorashooyinka Qaranka oo Muqdisho looga dooday

Dowladda Soomaaliya oo ku hanjabtay tallaabo sharci ah oo ka dhan ah dacaayadaha argagixisada