Soomaaliya, 20 Nofeembar 2025 — In ka badan 100 tahriibayaal Soomaaliyeed ayaa maanta dib loogu soo celiyay dalka, kadib bilo ay ku jireen xabsiyada Liibiya, iyadoo ay la kulmeen jirdil iyo tacaddi ay u geysteen tahriibiyayaal iyo shabakadaha ka ganacsada dadka.
Tahriibayaashan ayaa ku yimid diyaarad gaar ah oo marka hore ka degtay Garoonka Egal International ee Hargeysa, halkaas oo 13 qof laga dejiyay, ka dibna u soo gudubtay Garoonka Aadan Cabdulle ee Muqdisho, halkaas oo 152 qof oo kale lagu soo dhaweeyay. Dadka la soo celiyay waxaa ka mid ahaa 27 carruur ah, inta badanna waxay ahaayeen dhalinyaro ka yar 25 sano.
IOM ayaa sheegtay in tahriibayaashan lagu soo celiyay iyagoo ka faa’iideystay barnaamijka Voluntary Humanitarian Return (VHR) oo ay maalgeliso Midowga Yurub, kaas oo taageera tahriibayaasha si ay si badbaado leh ugu laabtaan dalalkoodii hooyo isla markaana dib ugu dhexgalaan bulshada.
Hawlgalkan ugu dambeeyay wuxuu tirada guud ee tahriibayaashii Soomaaliyeed ee sanadkan laga taageeray inay Liibiya uga soo laabtaan dalkooda gaarsiiyay ku dhowaad 557 qof, sida ay sheegtay IOM.
Markii ay soo gaareen Muqdisho iyo Hargeysa, tahriibayaashu waxay heleen hoy ku meel gaar ah, gaadiid, daryeel caafimaad iyo nafsiyeed, iyo sidoo kale telefoanno iyo kaarar SIM ah si ay ula xiriiraan qoysaskooda. IOM ayaa sheegtay in dhammaan soo celinta ay ahaayeen kuwo iskood u ogolaaday, kadibna la bixiyay la-talin si loo hubiyo in qof walba uu si xor ah oo xog ogaal ah u qaatay go’aanka ku noqoshada.
Maryan Yaasin, Ergeyga Gaarka ah ee Madaxweynaha Soomaaliya u qaabilsan Arrimaha Tahriibka iyo Xuquuqda Carruurta, ayaa sheegtay in howlgalkan uu muujinayo wacyigelin sii kordheysa oo dhalinyarada ka dhex jirta oo ku saabsan halista tahriibka sharci-darrada ah.
“Maanta sharaf ayay ii tahay inaan soo dhaweeyo tahriibayaal Soomaaliyeed oo doortay inay dalkooda hooyo ku soo laabtaan. Inkasta oo tahriibku weli sii kordhayo, haddana dhalinyaro badan ayaa garwaaqsan halistiisa oo go’aansaday inay dib u noqdaan,” ayay tiri.
Mid ka mid ah tahriibayaasha la soo celiyay, Axlaam Cabdikariin, ayaa ka warramtay xaaladda adag ee ay ka jirto xabsiyada Liibiya, iyadoo sheegtay in dad badan la jirdilo, qaarna halkaas ku geeriyoodeen hortooda.
