Muqdisho, 29 Janaayo 2026 (Dawan)- Dowladda Itoobiya ayaa waddo qorshe ay koronto ugu dhoofinayso Soomaaliya, iyadoo tani ka mid tahay istaraatiijiyad guud oo lagu xoojinayo isdhexgalka tamarta dalalka Geeska Afrika.
Arrintan waxaa shaaciyay Wasiirka Wasaaradda Maaliyadda Itoobiya, Axmed Shide, kaddib markuu waraysi gaaar ah siiyay warbaahinta Dawan xili uu ka qeybgalay Shirka 27-aad ee Wasiirrada Maaliyadda ee Hindisaha Geeska Afrika oo ka dhacay Muqdisho.
Axmed Shide ayaa sheegay in awoodda sii kordheysa ee Itoobiya ee tamarta dib-u-cusboonaan karta, gaar ahaan tamarta laga dhaliyo biyaha (hydropower), ay dalka u suuragelinayso inuu daboolo baahiyaha koronto ee dalalka deriska ah.
“Isdhexgalka tamartu wuxuu ka caawinayaa dalalka leh wax-soo-saar dheeraad ah inay la wadaagaan dalalka kale ee deriska la ah, si qiimuhu hoos ugu dhaco, helitaankuna u fududaado,” ayuu yiri Shide.