Addis Ababa (Dawan)– Sanduuqa Horumarinta Afrika ayaa ansixiyay deeq lacageed oo dhan $9.3 milyan, taas oo lagu maalgelinayo mashaariic lagu xoojinayo adkaysiga isbeddelka cimilada, sugnaanta biyaha, fayadhowrka iyo wax-soo-saarka cuntada ee bulshooyinka nugul ee Itoobiya iyo Koonfur Suudaan.
Guddiga Agaasimayaasha Sanduuqa ayaa deeqdan ansixiyay 15-kii Luulyo, iyadoo dhaqaalaha lagu fulin doono mashruuca Climate Proof Water4Food, oo isku xiraya adeegyada biyaha iyo horumarinta beeraha.
Mashruuca ayaa si gaar ah diiradda u saari doona gobolka Gambella ee Itoobiya iyo gobolka Unity ee Koonfur Suudaan, kuwaas oo si joogto ah ula kulma fatahaado iyo xaalado cimilo oo aad u daran, kuwaas oo sababa cunto-yari, burburka nolol-maalmeedka iyo barakaca bulshada.
Qorshaha mashruuca waxaa ka mid ah dhismaha iyo dib-u-dayactirka toddobo nidaam oo biyo-gelin ah oo ku shaqeeya tamarta qorraxda. Nidaamyadan ayaa la filayaa inay biyo nadiif ah gaarsiiyaan ku dhowaad 80,000 oo qof.
Mashruucu wuxuu sidoo kale hirgelin doonaa tallaabooyin isku dhafan oo lagu maareynayo fatahaadaha laguna yareynayo khasaaraha ka dhasha masiibooyinka cimilada ee saameeya beeraha, guryaha iyo ilaha biyaha.
