Addis Ababa (Dawan)– Itoobiya ayaa xoojinaysa dadaallada lagu dhexgelinayo qaxootiga bulshooyinka martigeliya, laguna ballaarinayo fursadahooda dhaqaale iyo horumarineed, sida uu sheegay Ra’iisul Wasaare Ku-xigeenka dalkaas, Temesgen Tiruneh. Dadaalladan ayaa qayb ka ah hannaan isku xiraya ilaalinta xuquuqda qaxootiga iyo ka qaybgalka nolosha bulshada iyo dhaqaalaha.
Temesgen ayaa qoraal uu ku baahiyay baraha bulshada ku sheegay in Itoobiya ay martigeliso in ka badan 1.1 milyan oo qaxooti ah oo ka kala yimid dalal kala duwan. Waxa uu tilmaamay in mas’uuliyadda dalka ay sidoo kale ku jirto xoojinta xiriirka qaxootiga iyo bulshooyinka deegaanka, iyo u fududeynta helitaanka fursadaha horumarineed, sida ay 1-dii Sebtembar 2026 werisay Fana Media Corporation.
Ra’iisul Wasaare Ku-xigeenka ayaa si gaar ah u xusay muhiimadda bixinta aqoonsiga dijitaalka ah, kaas oo qaxootiga u fududeynaya helitaanka adeegyada aasaasiga ah iyo ka qaybgalka hawlaha bulshada iyo dhaqaalaha.
Hadalka Temesgen ayaa yimid kaddib booqasho uu ku tagay xarunta dhexe ee Hay’adda Adeegga Qaxootiga iyo Dadka Soo Laabanaya, halkaas oo uu ku eegay dib-u-habayn ay hay’addu ku samaysay awooddeeda iyo khayraadkeeda.