Baqdaaad (Dawan) — Wasiirka arrimaha dibadda Jabuuti, Cabdulqaadir Xuseen Cumar, ayaa Sabtidii magaalada Baqdaad kula kulmay Madaxweynaha Ciraaq Nizar Amidi, iyagoo ka wada hadlay xoojinta xiriirka labada dal iyo ballaarinta iskaashiga dhinacyada ay danaha wadajirka ah ka leeyihiin, sida ay sheegtay Wakaaladda Wararka Jabuuti (ADI). Kulanka ayaa ka dhacay inta lagu guda jiray shirka 52-aad ee Golaha Wasiirrada Arrimaha Dibadda ee Ururka Iskaashiga Islaamka (OIC), oo ay wasiirku uga qaybgalayay magaalada Baqdaad.
Cabdulqaadir Xuseen Cumar, oo sidoo kale ah afhayeenka dowladda Jabuuti, ayaa madaxweynaha Ciraaq gaarsiiyay salaan uu uga siday Madaxweynaha Jabuuti Ismaaciil Cumar Geelle, iyo farriin muujinaysa walaaltinimo iyo rabitaanka nabad, xasillooni iyo barwaaqo uu u rajeeyay shacabka Ciraaq.
Labada mas’uul ayaa sidoo kale ka wada hadlay sidii loo xoojin lahaa xiriirka saaxiibtinimo ee taariikhiga ah ee u dhexeeya Jabuuti iyo Ciraaq, iyagoo muujiyay rabitaankooda ah in xiriirkaas loo abuuro hannaan cusub oo iskaashi oo ku saabsan dhinacyada istaraatiijiga ah ee labada dal danaha ka leeyihiin.
