New York (Dawan)- Dowladaha Jabuuti iyo Iran ayaa ku dhawaaqay Jimcihii inay dib u soo celiyeen xiriirkoodi diblomaasiyadeed kadib todobo sano.
"Maanta, Iran iyo Jabuuti waxay ku dhawaaqeen dib u soo celinta xiriirkooda diblomaasiyadeed” ayuu bartiisa X ku qoray, Wasiirka Arrimaha Dibadda ee Iran, Xuseen Amiir.
Go'aanka labada dowladood ayaa yimid kadib markii Wasiirka Arrimaha dibadda Jabuuti, Maxamuud Cali Yuusuf iyo dhiggiisa Iran ay wada xaajood ku yeesheen magaalada New York oo ay uga qeyb gelayaan Kalfadhiga 78-aad ee Golaha loo dhan yahay ee Qaramada Midoobay
Wasaaradda Arrimaha Dibadda ee Iran ayaa sheegtay in labada dal ku heshiiyeen hormarinta xiriirka saaxibtinimo iyo xoojinta iskaashiga dhinacyada kala duwan ee danta u ah muwaadiniinta labada dowladood.
Dowladda Jabuuti ayaa ka mid ahayd dowladihii u jaray xiriirka diblomaasiyadeed Iran kadib markii khilaaf xoogaan oo soo kala dhex galay dowladaha Sacuudiga iyo Iran
Heshiiska Jabuuti iyo Iran ayaa kusoo beegmaya kadib dhowr bilood markii Shiinuhu ku guuleystay inuu dhex dhigo heshiis lagu soo celinayao xiriirka dowladaha sacuudiga iyo Iran.