Rome (Dawan) – Jabuuti iyo Talyaaniga ayaa qorsheynaya inay sii xoojiyaan iskaashigooda dhaqaale iyo istaraatiijiyadeed ee hoos yimaada Qorshaha Mattei ee Talyaaniga ee loogu talagalay Afrika, kaddib kulan ay yeesheen wasiirrada dhaqaalaha ee labada dal oo diiradda lagu saaray maalgashiga, isku-xirnaanta iyo socdaalka.
Wasiirka Dhaqaalaha iyo Maaliyadda Jabuuti, Ilyaas Muuse Dawaaleh, ayaa sheegay inuu kulan "wax ku ool ah" la yeeshay Wasiirka Dhaqaalaha iyo Maaliyadda Talyaaniga, Giancarlo Giorgetti, kaas oo ay kaga wada hadleen xoojinta xiriirka laba geesoodka ah.
Qoraal uu ku baahiyay barta X ayuu Dawaaleh ku sheegay in kulankaasi uu gogol xaar u noqday iskaashi dhaqaale iyo mid istaraatiiji ah oo qoto dheer, kaas oo ku saleysan aragtida wadajirka ah ee madaxda labada dal.