Jabuuti (Dawan)– Hay’adda Dekedaha iyo Aagagga Xorta ah ee Jabuuti (DPFZA) ayaa Canada u soo bandhigtay adeegyo iyo nidaamyo lagu fududaynayo maaraynta xamuulka diblomaasiyadeed, iyadoo safaaradda Canada ee dalkaasi ay ka fiirsanayso inay xamuulkeeda rasmiga ah hawada ugu wareejiso badda.
Arrintan ayaa soo baxday kaddib kulan dhex maray Aboubaker Omar Hadi, guddoomiyaha hay’adda, iyo Karim Matallah, oo ah lataliyaha maamulka ahna qunsulka Safaaradda Canada. Kulanka ayaa ka dhacay Xarunta Red Sea World Centre, sida lagu sheegay qoraal ay hay’addu ku baahisay barta X. Hay’addu waxay xustay in xamuulka rasmiga ah ee ergada diblomaasiyadeed ee Canada uu hadda hawada ku yimaado.
Xamuulka diblomaasiyadeed waxaa ka mid ah dukumentiyada rasmiga ah, qalabka xafiisyada iyo isgaarsiinta, gaadiidka safaaradda iyo alaabta guryaha ee shaqaalaha diblomaasiyadeed. Heshiiska Vienna ee Xiriirka Diblomaasiyadeed ee 1961 ayaa ilaalinaya boorsooyinka diblomaasiyadeed, kuwaas oo aan la furi karin ama la hayn karin. Inkasta oo gaadiidka hawadu ka dhakhso badan yahay, haddana gaadiidka badda ayaa inta badan ka kharash yar marka la rarayo alaab culus ama waaweyn.
Hadi ayaa safaaradda Canada ku boorriyay inay isticmaasho Nidaamka Bulshada Dekedaha Jabuuti (DPCS), oo ah madal dijitaal ah oo fududaynaysa la socodka xamuulka iyo helitaanka xogtiisa, laga bilaabo marka uu dalka soo galo ilaa laga gaarsiinayo goobta loogu talagalay. Wuxuu sidoo kale xusay in hay’addu xafiis ku leedahay magaalada Addis Ababa ee caasimadda Itoobiya, kaas oo u adeegaya macaamiisha. Hadi ayaa sidoo kale hoggaamiya hay’ado dhowr ah oo la xiriira maamulka dekedaha iyo aagagga ganacsiga xorta ah ee Jabuuti, oo ay ka mid yihiin nidaamka adeegyada bulshada dekedaha, Dekedda Doraleh iyo Aagga Ganacsiga Xorta ah ee Caalamiga ah ee Jabuuti.