Jabuuti oo daahfurtay qorshe lagu casriyeynayo maamulka dhaqaalaha

Jabuuti (Dawan) – Dowladda Jabuuti ayaa billowday mashruuc cusub oo lagu xoojinayo maamulka dhaqaalaha iyo maareynta maaliyadda dowladda, kadib markii Ra’iisul Wasaare Cabdulqaadir Kaamil Maxamed uu si rasmi ah u daahfuray barnaamij qiimihiisu dhan yahay $20 milyan oo uu maalgelinayo Bangiga Adduunka.

Mashruuca, oo loo yaqaan Taageerada Maamulka Dhaqaalaha iyo Maaliyadda (PAGEF), ayaa loogu talagalay inuu taageero dib-u-habeynta hay’adaha dowladda, kor u qaadista hufnaanta maamulka iyo hagaajinta maareynta kheyraadka dadweynaha.

Munaasabadda daahfurka waxaa ka qeyb galay Wasiirka Miisaaniyadda Ismaan Ibraahim Rooble, Wasiirka Dhaqaalaha iyo Maaliyadda Ilyaas Muuse Dawaale, wakiillo ka socday Qaramada Midoobay, saaxiibada horumarinta iyo hay’ado qaran oo ka shaqeeya dib-u-habeynta maamulka.

Sida ay sheegtay dowladda Jabuuti, mashruucan ayaa la jaanqaadaya Hiigsiga Jabuuti 2035, waxaana lagu taageerayaa afar tiir oo muhiim u ah dib-u-habeynta maamulka iyo horumarinta hay’adaha dowladda.

Barnaamijku wuxuu diiradda saari doonaa xoojinta maamulka canshuuraha, hagaajinta maareynta kharashaadka dowladda, casriyeynta nidaamyada xogta maaliyadeed iyo horumarinta adeegyada dowladda ee dhijitaalka ah.

Sidoo kale, mashruucu wuxuu xoogga saari doonaa kor u qaadista nidaamyada kormeerka, hufnaanta iyo isla-xisaabtanka, si loo xoojiyo kalsoonida lagu qabo maamulka maaliyadda dadweynaha.

Dowladdu waxay sheegtay in mashruucaan uu door muhiim ah ka qaadan doono diyaarinta Miisaaniyadda Muwaadinka ee ugu horreysa dalka, taas oo ujeeddadeedu tahay in bulshada si fudud loogu sharxo siyaasadaha iyo mudnaanta miisaaniyadda qaranka.

Qiimeynno dhowaan la sameeyay ayaa muujiyay in Jabuuti ay horumar ka sameysay dhinacyada casriyeynta qaab-dhismeedka sharciyeed, xoojinta anshaxa miisaaniyadda iyo horumarinta nidaamyada maareynta maaliyadda dowladda. Hase yeeshee, warbixinnadaasi waxay sidoo kale tilmaameen in weli ay jiraan meelo u baahan dib-u-habeyn dheeraad ah si loo kordhiyo waxtarka iyo hufnaanta nidaamka maaliyadeed.

Mas’uuliyiinta dowladda ayaa sheegay in guusha mashruucan ay ku xirnaan doonto wada-shaqeyn dhow oo dhex marta wasaaradaha, hay’adaha kormeerka, saaxiibada horumarinta iyo bulshada rayidka ah.

Dowladda Jabuuti ayaa ku tilmaamtay PAGEF inuu yahay tallaabo cusub oo lagu casriyeynayo maamulka dadweynaha, laguna dhisayo nidaam maamul oo hufan, waxtar leh, isla markaana taageera koboca dhaqaalaha iyo horumarka bulshada ee dalka.