Jabuuti (Dawan ) – Sanduuqa Qaranka ee Ammaanka Bulshada (CNSS) ee Jabuuti ayaa bilaabay barnaamij tijaabo ah oo loogu magac daray “Grow Freely”, kaas oo lagu horumarinayo daryeelka carruurta qaba cudurka macaanka, iyadoo 169 carruur ah lagu qalabeeyay aalado casri ah oo si joogto ah ula socda heerka sonkorta dhiigga.
Barnaamijkan oo lagu fulinayo iskaashi dhex maray CNSS, madasha caafimaadka ee Medyc.io iyo Xarunta Carruurta Qaba Macaanka, ayaa carruurta ka faa’iideysanaysa lagu siiyay qalabka loo yaqaan Continuous Glucose Monitoring (CGM) oo bilaash ah.
Qalabkan casriga ah ayaa awood u siinaya in heerka sonkorta dhiigga si toos ah loo kormeero 24 saacadood maalintii, iyadoo aan loo baahnayn cirbado soo noqnoqda oo lagu cabbiro sonkorta, taas oo fududeynaysa maaraynta cudurka iyo tayaynta nolosha carruurta.
CNSS ayaa sheegtay in ujeeddada barnaamijku tahay in carruurta la siiyo madax-bannaani dheeraad ah oo ku saabsan la socodka xaaladdooda caafimaad, isla markaana la yareeyo culayska nafsiyeed iyo midka nololeed ee ka haysta waalidiinta iyo qoysaska.