Jabuuti oo ka cabsi qabta saameynta dhaqaale ee dagaalka Bariga Dhexe

Jabuuti (Dawan ) – Dowladda Jabuuti ayaa ka digtay in xiisadaha iyo dagaallada ka sii huraya gobolka Bariga Dhexe ay keeni karaan saameyn dhaqaale oo culus oo ku dhici karta dalalka soo koraya, gaar ahaan kuwa ku yaalla Geeska Afrika, sida Jabuuti.

Wasiirka Dhaqaalaha iyo Maaliyadda ee Jabuuti, Ilyaas Muuse Dawaaleh, oo qoraal ku daabacay bartiisa X (Twitter), ayaa sheegay in colaadaha sii kordhaya ay halis ku yihiin dhaqaalaha dalalka soo koraya, kuwaas oo horey ula tacaalayay nuglaansho iyo xasillooni darro.

Wasiir Dawaaleh ayaa xusay in dalalka yar yar sida Jabuuti, oo dhaqaalahoodu si weyn ugu tiirsan yahay ganacsiga iyo isu-socodka badeecadaha, ay si gaar ah u dareemi karaan saameynta ka dhalata qalalaasaha caalamiga ah.

“Dalalka yaryar sida Jabuuti, oo dhaqaalahoodu si weyn ugu tiirsan yahay ganacsiga, waxay halis ugu jiraan inay galaan hubanti la’aan dhaqaale, maadaama saameynta dhibaatooyinka dibadda ay ku fidi karaan guud ahaan gobolka iyo Afrika,” ayuu ku yiri qoraalka uu wasiirku ku baahiyay bartiisa X.

Wuxuu intaas ku daray in dalalka ku tiirsan ganacsiga ay halis ugu jiraan hubanti la’aan dhaqaale oo sii kordheysa, maadaama saameynta dhibaatooyinka caalamiga ah ay si fudud ugu faafi karto gobolka iyo guud ahaan qaaradda Afrika.

Dhaqaalaha Jabuuti ayaa si weyn ugu tiirsan adeegyada dekedaha, gaadiidka, iyo ganacsiga caalamiga ah, taasoo ka dhigaysa in isbeddellada ku yimaada dhaqaalaha iyo amniga caalamka ay si toos ah u saameeyaan kobaca dhaqaale ee dalka.