Jabuuti oo ku dhow inay ciribtirto cudurka duumada

Mas’uuliyiinta ayaa sheegay in kiisaska duumada ay hoos u dhaceen 80 % sannadihii u dambeeyay.

April 27, 2026

2 daqiiqo akhris

Waxaa qoray Asha Elmi - Reporter

Jabuuti (Dawan)— Dowladda Jabuuti ayaa sheegtay in kiisaska duumada (malaariyada) ay hoos u dhaceen boqolkiiba 80 sannadihii u dambeeyay, iyadoo mas’uuliyiintu ay xoojinayaan dadaallada lagu ciribtirayo cudurka, sida ay werisay Wakaaladda Wararka Jabuuti (ADI).

Kiisaska oo ahaa 73,535 sannadkii 2020-kii, iyagoo gaaray 16,250 sannadkii 2025-kii, sida ay sheegeen saraakiisha caafimaadka oo ay soo xigatay wakaaladdu.

Tirooyinkan ayaa lagu soo bandhigay munaasabad lagu xusayay Maalinta Duumada Adduunka, oo lagu qabtay rugta caafimaadka ee IFTIN, taas oo ay soo qabanqaabisay Wasaaradda Caafimaadka, sida lagu sheegay warbixinta.

Saraakiisha ayaa sheegay in horumarkan uu ka tarjumayo dadaallo joogto ah, oo ay ka mid yihiin faragelin isku dubaridan iyo xoojinta istiraatiijiyadaha caafimaadka dadweynaha.

“Guulahan waxay ka dhasheen go’aan wadajir ah oo joogto ah,” ayuu yiri sarkaal sare oo ka tirsan Wasaaradda Caafimaadka, sida ay werisay ADI.

Maqaallo la xidhiidha

34 daqiiqo kahor

Deni oo dhagax-dhigay xarunta Bangiga Puntland ee Badhan

1 saac kahor

Muxuu yahay Mashruuca Bulsho ee Soomaaliya daah-furtay?

Si kastaba ha ahaatee, mas’uuliyiintu waxay ka digeen in horumarku weli yahay mid jilicsan, waxayna ku baaqeen in la sii wado feejignaanta, lana kordhiyo wacyigelinta bulshada, isla markaana la xoojiyo faragelinta tooska ah ee goobaha ay dhibaatadu ka jirto.

Wakiilka Ururka Caafimaadka Adduunka (WHO) ee Jabuuti ayaa ku tilmaamay arrintan mid “cajiib ah,” isagoo intaas ku daray in khibradda dalku ay muujineyso in ciribtirka duumada lagu gaari karo rabitaan siyaasadeed oo xooggan iyo tallaabooyin si gaar ah loo beegsaday.

Jabuuti ayaa sheegtay inay higsaneyso inay si buuxda u ciribtirto duumada, iyadoo taageero ka helaysa saaxiibada caalamiga ah, oo ay ka mid yihiin WHO iyo Sanduuqa Caalamiga ah (Global Fund).