Jabuuti oo martigelinaysa Madasha Afrika ee Xoojinta Silsiladda Sahayda Agabka Caafimaadka

Jabuuti, 19 Nofeembar 2025 — Dowladda Jabuuti ayaa si rasmi ah u furtay Madasha 3-aad ee Afrika ee Xoojinta Silsiladda Sahayda Agabka Caafimaadka (FARCAPS), shir heer qaaradeed oo diiradda saaraya sidii loo xoojin lahaa sahayda caafimaadka, loo casriyeyn lahaa nidaamyada kaydinta, loona kordhin lahaa awoodda ay waddamada Afrika uga jawaabaan xaaladaha caafimaad ee degdegga ah.

Shirkan oo soconaya 18–20 Nofeembar ayaa, sida ay sheegtay Jabuuti, waxaa ka qeyb galaya ku dhowaad 300 khabiir, madax caafimaad, deeq-bixiyeyaal iyo wakiillo ka socda 20 dal oo Afrika ah.

Madasha waxaa furay Wasiirka Caafimaadka Jabuuti, Axmed Rooble Cabdulle, oo ay wehelinayeen khubaro Afrikaan iyo kuwo caalami ah.

Wasiirka ayaa sheegay in shirka uu yahay madal muhiim ah oo lagu mideynayo dadaallada lagu xoojinayo sahayda caafimaadka ee Afrika, isagoo xusay baahida loo qabo in waddamada qaaraddu yeeshaan awood soo-saar iyo kayd oo madax-bannaan.

“Hadafka ugu weyn ee aan ka sugayno shirka waa sidii aan u xoojin lahayn oo aan u horumarin lahayn soo-iibsiga iyo kaydinta dawooyinka, si waddamada Afrika ay u horumaraan,” ayuu yiri Wasiir Axmed Rooble.

Wadahadallada ka socda Jabuuti ayaa dhacaya xilli ay sii kordhayaan walaacyada ku saabsan ku-tiirsanaanta Afrika ee silsiladaha sahayda dibadda.

Warbixin dhowaan ay soo saartay Hay’adda Qaramada Midoobay ee Ganacsiga iyo Horumarinta (UNCTAD, 2024) ayaa sheegtay in “in ka badan 70% daawooyinka Afrika laga keeno dibadda.”

Mas’uuliyiinta iyo khubaradu waxay tilmaameen in ku-tiirsanaantan sare ay khatar weyn ku tahay dalalka Afrika, gaar ahaan xilliyada ay dhacaan masiibooyin caafimaad oo degdeg ah, sida cudurrada faafa, daadadka ama abaaraha sababa faafitaanka xanuunnada.

Mas’uuliyiinta Jabuuti ayaa carrabaabay in kaabayaasha casriga ah ee dalka—oo ay ku jiraan dekedaha, garoomada diyaaradaha iyo aagga ganacsiga xorta ah—ay u sahlayaan Jabuuti inay noqoto xarun muhiim u ah qaybinta agabka caafimaadka ee gobolka.

Wasiir Rooble wuxuu sheegay in kaabayaasha waddanku ay si dabiici ah u dhigayaan Jabuuti inay noqoto “xudunta isku xirta” dalalka IGAD iyo kuwa ka baxsan.

Kulanka waxaa sidoo kale ka qaybgalaya hay’adaha deeq-bixinta iyo ururrada caalamiga ah, kuwaas oo ku baaqaya in la mideeyo siyaasadaha qaran, la isdhaafsado xogta, lana hagaajiyo habraacyada kaydinta iyo qaybinta si loo dhimo kharashaadka loogana hortago dib-u-dhaca ku yimaada agabka caafimaadka.

Shirka ayaa la filayaa inuu soo saaro talooyin ku wajahan xoojinta kaydka qaran ee dawooyinka, horumarinta warshadaynta caafimaadka gudaha Afrika, iyo ballaarinta nidaamyada dijitaalka ah ee raadraaca agabka.