Jabuuti, 11 Janaayo 2026 (Dawan)– Jabuuti ayaa maalintii Sabtida bilowday laba aqoon-is-weydaarsiyo oo gaar ah, kuwaas oo ujeedkoodu yahay in lagu casriyeeyo masraxa iyo warshadaha hal-abuurka. Tallaabadan ayaa qeyb ka ah dadaalka ay dalka Geeska Afrika ku yaalla ku doonayo inuu waaxda dhaqanka ugu beddelo tiir dhaqaale oo rasmi ah, iyadoo laga helayo taageero ururka Waxbarashada, Dhaqanka iyo Sayniska ee Jaamacadda Carabta (ALECSO).
Barnaamijka tababarka ayaa ka kooban farsamooyinka masraxa, naqshadeynta iyo maaraynta mashruucyada dhaqanka, iyo hannaanka sharci ee looga baahan yahay horumarinta iyo maamulida warshadaha hal-abuurka.
Aqoon-is-weydaarsiyadan, oo ay soo qabanqaabisay Hay’adda Qaranka ee Horumarinta Dhaqanka, ayaa laga furay Maktabadda Qaranka, waxaana goob-joog ka ahaa Wasiirka Dhallinyarada iyo Dhaqanka, Hibo Muumin Cisoowe, iyo Agaasimaha Guud ee Hay’adda, Maxamed Xuseen Ducaale. Munaasabadda waxaa sidoo kale ka qaybgalay khubaro iyo wakiillo ka socday ALECSO, kuwaas oo taageeray tababarrada farsamo iyo maamulka mashruucyada dhaqanka.
Tababarradan ayaa lagu horumarinayaa xirfadaha fanaaniinta, jilayaasha, iyo maamulayaasha dhaqanka, si ay u yeeshaan awood farsamo iyo maamul oo lagu maareeyo mashruucyada masraxa iyo warshadaha hal-abuurka. Istaraatiijiyadda ballaaran ee dowladda Jabuuti ayaa hiigsanaysa in fanka loo beddelo warshad hal-abuur oo wax soo saar leh, taas oo gacan ka geysanaysa horumarinta dhaqaalaha iyo shaqo-abuurka.