Jabuuti, 18 Nofeembar 2025 — Dowladda Jabuuti ayaa bilaawday Shir qaran oo looga hadlayo xoojinta maalgashiga qeybta gaadiidka, casriyeynta kaabayaasha dhaqaalaha, iyo adkeynta kaalinta dalka ee xarunta hoggaamineed ee saadka (logistics hub) ee Geeska Afrika.
Shirka oo soconaya laba maalmood, ayaa Isniintii si rasmi ah uga furmay Magaalada Jabuuti, waxaana soo qaban-qaabiyay Wasaaradda Maalgashiga iyo Hay’adda Qaranka ee Horumarinta Maalgashiga (ANPI).
Waxa uu isugu keenay saraakiil sare oo dowladeed, shirkado gaar ah, bah-wadaag horumarineed iyo ururrada shaqaalaha gaadiidka, kuwaas oo ka doodayo caqabadaha iyo fursadaha ka jira qeybaha waddooyinka, duulista hawada, tareennada iyo marin-biyoodka badda.
Mas’uuliyiintu waxay sheegeen in hindisahan uu qayb ka yahay istaraatijiyadda muddada-dheer ee Jabuuti ee lagu doonayo in lagu xoojiyo tartanka dhaqaalaha, lagu soo jiito maalgelinta gaarka loo leeyahay, laguna ballaariyo isku-xirka gaadiidka.
Wasiirka Kaabayaasha Dhaqaalaha iyo Qalabka, Xasan Xaamud Ibraahim oo ka hadlayay munaasabadda furitaanka, wuxuu sheegay in shirkani uu yahay tallaabo muhiim ah oo lagu furayo awoodda buuxda ee ku jirta waaxda gaadiidka ee Jabuuti.
“Gaadiidka iyo saadka waa laf-dhabarta dhaqaalahayaga — waa halbowlayaasha istaraatiijiga ah ee xiriiriya qaaraddeenna iyo dunida,” ayuu yiri Ibraahim.
“Inkasta oo horumar ballaaran la gaaray intii uu talada hayay Madaxweynaha Jamhuuriyadda Mudane Ismaaciil Cumar Geelle, haddana awoodda dhabta ah ee waaxdu wali si buuxda looma faa’iideysan,” ayuu ku daray.
Wasiirku wuxuu xusay in Jabuuti ay sannadihii la soo dhaafay maalgelin xoog leh ku samaysay dekedaha, tareennada, waddooyinka iyo duulista hawada, taasoo xoojisay kaalinta dalka ee ah madal saadka u adeegsada gobolka oo dhan.