Jabuuti oo soo bandhigtay qalab AI ah oo lagu casriyeynayo dekedaha iyo saadka

Jabuuti (Dawan)— Jabuuti ayaa ballaarinaysa isticmaalka garaad gacmeedka ee dekedaha, saadka iyo kaabayaasha gaadiidka, iyadoo dooneysa inay hagaajiso hufnaanta iyo xoojiso doorkeeda xarun ganacsi oo gobolka ah, sida ay sheegtay Hay’adda Dekedaha iyo Aagagga Xorta ah ee Jabuuti (DPFZA) Arbacadan maanta ah.

Hay’adda Dekedaha ayaa qoraal ay soo dhigtay barta X ku sheegtay inay soo bandhigtay dhowr adeeg oo ku shaqeeya AI, intii lagu jiray madashii qaran ee ugu horreysay ee Jabuuti ee garaad gacmeedka, kuwaas oo ay ku jiraan qalab lagu saadaaliyo dhaqdhaqaaqa konteenarrada, lagu yareeyo ciriiriga dekedaha iyo lagula socdo xaaladda waddooyinka mara marinnada ganacsi ee gobolka.

Mid ka mid ah teknoolojiyadda la soo bandhigay ayaa ahayd DPCS Foresight, oo ah madal saadaalin ah oo adeegsata xogta silsiladda sahayda, xogta taariikhiga ah iyo waxqabadka dhinacyada saadka si ay u saadaaliso xilliga ay macaamiishu u badan tahay inay ka qaataan konteenarrada terminal-yada, sida ay sheegtay DPFZA

Hay’addu waxay sheegtay in nidaamku ka caawin karo terminal-yada inay konteenarrada la filayo in dhowaan la qaado dhigaan meelo si fudud loo heli karo, halka kuwa aan la filayn in muddo dhow la qaado lagu ridi karo meelaha hoose ee kaydka.

DPFZA waxay sheegtay in tani ay yareyn karto dib-u-qaadista iyo dib-u-dhigista konteenarrada, gaabin karto muddada ay dekedda ku jiraan, hagaajin karto isticmaalka barxadaha kaydka isla markaana yareyn karto ciriiriga.

Madashu waxay ujeeddadeedu tahay inay dhoofiyeyaasha iyo soo dejiyeyaasha siiso saadaal wanaagsan oo ku saabsan gaarsiinta xamuulka, halka hay’adaha ay xogta uga faa’iideysan karaan saadaalinta mugga badeecadaha soo galaya, kuwa transit-ka ah iyo kuwa dhoofaya, iyo qorsheynta kaabayaasha iyo kheyraadka saadka, ayay hay’addu sheegtay.

Adeeg kale oo DPFZA ay soo bandhigtay ayaa ahaa DPCR Vision AI, oo ah nidaam garaad gacmeed ah oo lagu kormeero xaaladda waddooyinka oo ay samaysay Shirkadda Waddooyinka Isku Xira Dekedaha Jabuuti si ay ula socoto xaaladda waddooyinka mara marinnada ganacsi ee gobolka.

Nidaamka oo la bilaabay 2024 ayaa adeegsada kamarado sawirro ka qaada waddooyinka, halka AI-du ay falanqeyso sawirrada si ay u ogaato ciladaha ay ka mid yihiin godadka iyo dildilaaca, isla markaana ay tilmaanto goobaha ay ku yaallaan, sida ay sheegtay DPFZA.

Madaxweyne Ismaaciil Cumar Geelle ayaa madasha ka sheegay in AI-du ay Jabuuti u tahay fursad dhaqaale oo weyn haddii loo isticmaalo si mas’uuliyad iyo istaraatiijiyad leh. Wuxuu carrabka ku adkeeyay muhiimadda ay leedahay in horumarinta AI-da lagu saleeyo mudnaanta iyo qiyamka qaranka, isla markaana teknoolojiyadda looga faa’iideysto horumarinta ka-qaybgalka bulshada iyo sinaanta fursadaha, sida ay hay’addu sheegtay.

Jabuuti ayaa sidoo kale doonaysa inay xoojiso doorkeeda ah xarun saadka iyo ganacsiga ee Geeska Afrika, iyadoo adeegsanaysa teknoolojiyadda soo baxaysa si ay u horumariso adeegyada dadweynaha iyo kuwa gaarka loo leeyahay, una kordhiso tartanka dhaqaale ee dalka.