Jabuuti (Dawan) — Dowladda Jabuuti iyo ganacsatada gaarka loo leeyahay ayaa qaaday tallaabo cusub oo lagu xoojinayo iskaashiga dhinaca tababarka iyo shaqaaleysiinta, kaddib markii Wasaaradda Shaqada iyo Rugta Ganacsiga ay ku heshiiyeen in si wadajir ah loo maamulo Xarunta Kheyraadka iyo Xirfadaha (CRC).
Wasiirka Shaqada ee qaabilsan Rasmiyeynta iyo Ilaalinta Bulshada, Yonis Ali Guedi, iyo Madaxweynaha Rugta Ganacsiga Jabuuti, Youssouf Moussa Dawaleh, ayaa Arbacadii gaaray heshiis mabda’ ah oo dhigaya in labada dhinac ay wadaagaan maamulka iyo horumarinta xarunta, sida ay sheegtay Wakaaladda Wararka Jabuuti ee ADI.
Tallaabadan ayaa qeyb ka ah dadaallada lagu doonayo in tababarrada xirfadeed laga dhigo kuwo si dhow uga jawaaba baahiyaha shirkadaha iyo suuqa shaqada, xilli dhalinyarada loo diyaarinayo xirfado kordhin kara fursadaha shaqo.
Kulanka waxaa ka qeyb galay masuuliyiin ka kala socday Rugta Ganacsiga, Wasaaradda Shaqada, Hay’adda Qaranka Shaqada, Tababarka iyo Isdhexgalka Xirfadeed (ANEFIP) iyo Machadka Qaranka Maamulka Dadweynaha (INAP).
Wadahadallada ayaa sidoo kale diiradda lagu saaray mashruuc ay maalgeliso Hay’adda Horumarinta Faransiiska (AFD), kaas oo la xiriira mustaqbalka Xarunta Kheyraadka iyo Xirfadaha.
