Jigjiga (Dawan)— 400 arday oo danyar ah oo wax ka barta dugsiyada hoose iyo dhexe ee magaalada Jigjiga ayaa Talaadadii loo qaybiyey agab waxbarasho oo ay ku bilaabaan sannad-dugsiyeedka cusub ee 2019-ka Tirsiga Itoobiya (2026/2027).
Agabka loo qaybiyey ardayda ayaa isugu jiray buugaag, qalimaan, boorsooyin iyo dharka iskuulka, iyadoo taageeradan loogu talagalay in ardayda danyarta ah aysan waxbarashada uga harin duruufo dhaqaale awgood.
Qorshahan ayaa qayb ka ah dadaallo lagu doonayo in xilliyada fasaxa xagaaga la helo laguna gaarsiiyo ardayda danyarta ah agabka iyo adeegyada ay u baahan yihiin, si ay sannad-dugsiyeedka cusub ugu bilaabaan si wanaagsan.
Agabka waxbarashada waxaa soo iibsaday iskaashato ay leeyihiin ganacsatada garabka haweenka ee Xisbiga Barwaaqo, kuwaas oo sheegay in taageeradu ay qayb ka tahay dadaallada lagu garab istaagayo ardayda ka soo jeeda qoysaska dhaqaalahoodu hooseeyo.
Munaasabadda lagu guddoonsiinayey agabka, waxaa ka qayb galay Wasiirka Xafiiska Waxbarashada Dowlad Deegaanka Soomaalida, Maxamed Sheekh Aadan, Wasiir-ku-xigeenka Arrimaha Haweenka iyo Carruurta, Ubax Cabdiraxmaan, Ku-xigeenka Duqa Magaalada Jigjiga, Khadar Budul, iyo masuuliyiin kale.
