Jigjiga, 3december 2025 – Dowlad Deegaanka Soomaalida ayaa taladadii si rasmi ah uga daahfurtay mashruuc lagu sameynayo daraasad ballaaran oo ku saabsan helitaanka biyaha dhulka hoostiisa, kaas oo laga hirgelin doono 20 degmo oo xuduud wadaag la ah Soomaaliya. Mashruucan waxaa fulinaysa UNICEF, waxaana maalgelinaya Bangiga Midowga Yurub (EU Bank).
Ujeedka mashruuca ayaa ah in la baaro xaaladda biyaha dhulka hoostiisa si loo qorsheeyo biyo gelin waarta oo ay ka faa’iideystaan bulshada ku nool degmooyinka ay saameeyaan abaarta iyo cimilada adag. Intii lagu guda jiray munaasabadda, waxaa lagu falanqeeyay sida loo heli karo daraasad dhammeystiran oo lagu ogaanayo goobaha suurtagalka ah ee ceelasha laga qodi karo.
Munaasabadda waxaa ka soo qeybgalay Wasiirka Maaliyadda DDS, Wasiirka Biyaha DDS, wakiillo ka socday hay’adaha fulinaya mashruuca, iyo khubaro ku takhasusay daraasadaha biyaha.
Wasiirka Biyaha DDS, Axmed Miraal, ayaa sheegay in mashruuca loogu talagalay in lagu baaro 20-ka degmo si loo ogaado halka ay ku yaallaan ilo-biyoodka suuragalka ah.
“Waxaan rajeyneynaa marka daraasadda la dhammeeyo in la guda geli doono qodista ceelasha iyo biyo gelinta, kuwaas oo ilaa 10 ceel gaari kara,” ayuu yiri Axmed Miraal.