Kismaayo (Dawan) — Wasaaradda Awqaafta iyo Arrimaha Diinta ee Dowlad-goboleedka Jubaland iyo Golaha Culimada Jubaland ayaa soo saaray bayaan ay ku qaadacayaan Hindise-Sharciyeedka Dhismaha Golaha Culimada Soomaaliyeed, kaas oo Wasaaradda Awqaafta iyo Arrimaha Islaamka ee Xukuumadda Federaalka Soomaaliya ay u gudbisay Golaha Shacabka.
Bayaanka oo kasoo baxay Xafiiska Wasiirka Wasaaradda Awqaafta iyo Arrimaha Diinta ee Dowlad-goboleedka Jubaland, Maxamed Yuusuf Cumar, ayaa lagu sheegay in Wasaaradda iyo Golaha Culimada Jubaland ay si buuxda uga soo horjeedaan hindise-sharciyeedka, iyagoo ku tilmaamay mid aan ku habboonayn qaabka loo maray diyaarintiisa.
Wasaaradda iyo Golaha Culimada Jubaland ayaa sheegay in hindise-sharciyeedka uu u baahan yahay wadatashi iyo wada-hadal ballaaran, gaar ahaan in lala tashado dowlad-goboleedyada iyo culimada Soomaaliyeed ka hor inta aan la sii ambaqaadin hannaanka sharciyeed.
“Waxaa la tilmaamay in sharcigan uu yahay mid aan lagala tashan Dowladda Xubnaha Ka ah Dowladda Federaalka, gaar ahaan Jubaland, iyo culimada deegaanada Jubaland,” ayaa lagu yiri bayaanka.
Labada dhinac ayaa sidoo kale sheegay in arrimaha la xiriira Golaha Culimada ay u baahan yihiin in si wadajir ah looga arrinsado, iyadoo la tixgelinayo doorka culimada iyo dowlad-goboleedyada ee arrimaha diinta.
