Jubbaland oo gaashaanka u daruurtay go’aanka ay dowladdu ku laashay heshiisyada Imaaraadka

Kismaayo (Dawan)- Dowlad-goboleedka Jubbaland ayaa si adag uga hor timid go’aan ay shalay soo saartay Dowladda Federaalka Soomaaliya oo lagu joojiyay heshiisyadii Imaaaraadka Carabta ee la xiriiray dekedda Kismaayo, iyadoo ku tilmaantay tallaabadaas mid baalmarsan dastuurka federaalka iyo kan Jubbaland.

Bayaan rasmi ah oo ka soo baxay madaxtooyada Jubbaland ayaa lagu sheegay in wareegtada ka timid Muqdisho ay tahay “mid aan sharci ahayn, isla markaana aan wax saameyn ah lahayn”, maadaama – sida ay sheegtay – ay ku xadgudbayso awoodaha dastuuriga ah ee dowlad-goboleedka.

Jubbaland waxay ku adkaysatay in iyadu leedahay awoodda keliya ee ku saabsan maamulka dekedda Kismaayo, heshiisyada ganacsi, iyo maalgashiga shisheeye, iyadoo tixraacday qodobbo ka mid ah dastuurkeeda u oggolaanaya horumarinta kaabayaasha dhaqaalaha iyo la macaamilka maalgashadayaasha caalamiga ah.

"Dawladda Jubaland... waxay u aragtaa go’aanka maanta ka soo baxay Dawladda Federaalka mid aan jirin," ayaa lagu yiri bayaanka, iyadoo si gaar ah loo xusay dekedda istiraatiijiga ah ee Kismaayo.

Hadalkan Jubbaland ayaa imanaya xilli Dowladda Federaalka Soomaaliya ay shalay si rasmi ah u burisay dhammaan heshiisyadii ay la lahayd Dowladda Isutagga Imaaraadka Carabta, oo ay ku jiraan kuwa la xiriira maamulka dekedaha iyo iskaashiga amniga, kuwaas oo dekedda Kismaayo ay qayb ka ahayd.

Mas’uuliyiinta Jubbaland ayaa ku eedeeyay dowladda federaalka inay ku tumatay mabda’a federaalka, isla markaana aysan kala tashan dowlad-goboleedyada go’aannada saameynta tooska ah ku leh maamullada xubnaha ka ah dowladda federaalka. Waxay sidoo kale sheegeen in tallaabooyinkan ay hoos u dhigayaan wadajirka qaranka iyo kalsoonida u dhexeysa heerarka kala duwan ee maamulka.

“Jubaland oo kaliya ayaa leh xaqa ay wax uga beddelayso ama ku joojinayso [heshiisyadan]," ayaa lagu daray bayaanka, iyadoo lagu adkeeyay in Jubbaland ay sii wadi doonto heshiisyada horumarineed iyo kuwa amni ee ay horay u gashay.

Ilaa iyo hadda, Dowladda Federaalka Soomaaliya kama aysan bixin wax faallo ah oo rasmi ah diidmada Jubbaland, hase yeeshee khilaafkan cusub ayaa imanaya xilli dalka uu wajahayo xaalad siyaasadeed oo xasaasi ah, gaar ahaan arrimaha la xiriira awood-qaybsiga, kheyraadka, iyo maamulka kaabayaasha istiraatiijiga ah.